“Эрх баригчид 17 тэрбумаар сонгуулийн мөнгөө босгосон байж магад”

Нефть импортлогч компаниуд 2012 оны нэгдүгээр сарын 06-07-нд шилжих шөнө бензин, шатахууны үнийг 210-260 төгрөгөөр нэмэгдүүлж багагүй шуугиан тарьсан. Улмаар нэр бүхий найман компанид 17 тэрбум төгрөгийн торгуулийг Шудрага өрсөлдөөн хэрэглэгчийн төлөө газрын улсын байцаагчид тавьсан.

Харин ШӨХТГ-ын дөрөвдүгээр сарын 10-ны өдрийн хуралдаанаар тус аж ахуйн нэгжүүдэд ногдуулсан 17 тэрбум төгрөгийн торгуулийг хүчингүй болгох шийдвэрийг гаргасан юм.

Энэ шийдвэрийг МҮЭХ-ноос эсэргүүцэж буйгаа илэрхийллээ. МҮЭХ-ны ерөнхийлөгч С.Ганбаатар:

-17,2 тэрбум төгрөгийн торгуулийн шийдвэрийг цуцалсан шийдвэрийн ард Б.Лхагва тэргүүтэй ШӨХТГ-ынхан мөн Хотын дарга асан УИХ-ын гишүүн Ц.Батбаяр даргатай “Хэрэглэгчдийн үндэсний холбоо” болон Шадар сайд М.Энхболд нар байгаа бөгөөд тэд энд хариулт өгнө.

Энэ 17 тэрбум төгрөг гэдэг бол 170 мянган ахмад маргааш шууд сая төгрөгөө авах, 40 мянган жижиг дунд үйлдвэрлэгчид тус бүр 4 сая төгрөгийн тусламж авах, 4000 айл орон сууцанд орох мөнгө. Бид ард иргэдээс аль хэдийнээ авчихсан мөнгөний тодорхой хэсгийг л шаардаж байгаа хэрэг. Энэ асуудлыг ирэх лхагва гаригт буюу 23-нд Засгийн газрын хуралдаанаар хэлэлцэхгүй бол бид тэмцлийн арга хэмжээ зохион байгуулна.

Тухайн үед шалгалт хийсэн хүмүүс буюу ахлах байцаагч нь болох Цогтгэрэл гэгч тушаал дэвшээд хэлтсийн дарга болчихсон. Мөн Батсуурь гэдэг байцаагч нь одоо Солонгост явж байгаа. Ийм байж болох уу.

Ард түмэнд очих ёстой байсан, төсөвт очих ёстой байсан 17 тэрбум төгрөгийг ийнхүү цуцалсан нь сонгуулийн мөнгөө босгож байна гэсэн хардлагыг төрүүлж байна. Мөн “сөрөг хүчин” болох Ардчилсан намынхан яагаад үг дугарахгүй байгаа юм бэ гэлээ.

Та бүхэн холбоотой мэдээнээс ШӨХТГ-ын дарга Б.Лхагвын байр суурийг хүлээн авна уу.

О.Ариунбилэг

Холбоотой мэдээ Текст Нефть импортлогч компаниудад ногдуулсан 17 тэрбумын торгуулийг хүчингүй болгосныг эсэргүүцэв