Д.Ганхуяг: Малайзын талд бид олон удаа хүсэлт тавьсан

Энэ мэдээг шинэ хувилбараар унших бол арын товч дээр дарна уу
"НИЙГМИЙН ТОЛЬ"

2012-06-18 09:57 GMT+8

ГХЯ-ны Консулын газрын дарга Д.Ганхуягаас зарим зүйлийг тодрууллаа.

-Ш.Алтантуяагийн хэрэгтэй холбогдуулаад ажлын хэсэг гарсан. Энэ ажилд үр дүн байна уу?

-Малайзад манай иргэн Ш.Алтантуяагийн амь насыг бүрэлгэсэн хэрэг гараад нэлээд удаж байна. Үүнд гадаад харилцааны яам, Засгийн газар, УИХ бүх түвшинд малайзын талд асуудлыг шударгаар шийдэж өгөөч гэх хүсэлтийг тавьж ирсэн. Он гарснаас хойш дээрх асуудлыг сайдын зөвлөлөөр хэлэлцээд, бодлого гаргасан. Үүнээс бид газар дээр нь ажиллах нь зүйтэй гэсэн чиглэл авсан байгаа.

-Тэгвэл хэзээнээс ажлын хэсэг Малайзад очиж ажиллах вэ?

-Бид саналаа малайзын талд тавьсан. Малайзын тал манай төлөөлөгч нарыг наймдугаар сард хүлээж авъя гэсэн хариу өгсөн. Тэр үед ГХЯ болон бусад холбогдох байгууллагын төлөөлөгч нар хамт явна.

-Наймдугаар сарын сүүлчээр хэргийг үйлдсэн цагдаа нарын шүүх хурал болно. Тэр үеэр очих юм уу?
-Шүүх хурлын үеэр тааруулж очиж магадгүй. Мөн БНХАУ-д суугаа онц бөгөөд бүрэн эрхэт элчин сайд Ц.Сүхбаатар малайзын элчин сайдтай уулзаж дээрх асуудлыг тавьсан. Манай талаас "Хоёр талын хүчний байгууллагуудын хамтын ажиллагааг идэвхжүүлэх, хамтын ажиллагааны  санамж бичиг    байгуулъя" гэсэн хүсэлт тавьсан. Цаашид энэ чиглэлээр хэлэлцээр хийгдэнэ.

-Ер нь 2006 оноос хойш, иргэн Ш.Алтантуяагийн хэргийн асуудлаар ямар ажил хийгдсэн бэ?
-Манай консулын газар, Хууль зүй, дотоод хэргийн яам, Төрийн бус байгууллага болон талийгаачийн ар гэрийнхэн нь шүүх хуралд оролцож байсан. Засгийн газраас хөрөнгийг нь гаргаж ажиллаж байсан. Мөн Тайландад байгаа элчин сайдын яамны консулын ажилтан томилолтоор Малайз руу очиж, ажилласан. Гэвч Малайзын талаас хойрго байдаг. Шүүх хурлаар хэрхэн шийдэж байгаагаа мэдээлдэггүй.

-Малайзад байгаа иргэдээс гэмт хэрэгт холбогдох нь нэмэгдсэн. Гэтэл тус улсад манай элчин сайдын яам байдаггүй. Халуун бүс болоод байгаа улсад яагаад манай консулын газар байхгүй байна вэ?

-Малайзад бидний тооцоогоор мянгаад иргэн ажиллаж, сурч байна. Тэнд манай улсаас элчин сайдын яам байхгүй. Урьд нь өргөмжит консул байсан ч ажлаасаа чөлөөлөгдсөн.

Тиймээс одоогийн байдлаар Малайзад манай төлөөлөл байхгүй. Тиймээс Тайланд улсад суугаа манай элчин сайд хавсарч ажилладаг. Харин шинээр элчин сайдын яам байгуулах асуудлыг хоёр тал харилцан зөвшилцсөний үндсэн дээр шийднэ. Малайз болон Монголын сонирхол ямар байна гэдгийг нарийвчилж судлаад, Засгийн газрын хурлаар шийдэх асуудал.

-Он гарснаас хойш Малайзад байгаа манай иргэдээс гэмт хэрэгт холбогдсон уу. Энэ талаарх мэдээлэлд хяналт тавьдаг уу?
-Малайзад байгаа монгол иргэд Хятад руу хар тамхи тээвэрлэх, гэмт хэрэгт нэлээд холбогддог. Өнгөрөгч онд 20 гаруй иргэн холбогдсон. Одоогийн байдлаар он гараад холбогдсон иргэд гараагүй байна. Мөн гадаадад манай иргэн хар тамхи болоод бусад гэмт хэрэгт холбогдох асуудал дээр хууль, прокурор, цагдаагийн байгууллагууд хамтарч ажиллавал үр дүнтэй.

Э.Энхцолмон

GoGo Facebook Хуудас
 
 
Ерөнхийлөгчийн санаачилсан Монгол Улсын Үндсэн хуульд оруулах нэмэлт, өөрчлөлтийн төслийн УИХ-ын гишүүдийн тоог 108 болгож, бүрэн эрхийн хугацааг таван жил болгох заалтыг та дэмжиж байна уу.
Нийт 660 санал өгсөн байна.

Дээшээ