Тээврийн хэрэгслийг улсын дугаараар ангилан замын хөдөлгөөнд оролцуулахаар боллоо

НЗДТГазар

2012-08-22 18:03 GMT+8

Нийслэлийн иргэдийн төлөөлөгчдийн ээлжит бус II хурал нэг цаг завсарласны дараа, замын хөдөлгөөний ачааллыг бууруулах зарим арга хэмжээний тухай үргэлжлүүлэн хэлэлцлээ. Замын хөдөлгөөний ачааллыг бууруулах цогц арга хэмжээний хүрээнд

1. Төрийн албан хаагч нарыг ажилдаа ирэх, явахдаа нийтийн тээврийн хэрэгслээр явдаг болох

2. Төрийн байгууллага худалдааны төвлөрсөн төвийн гаднах авто зогсоолд тухайн байгууллагын ажилчдын автомашин зогсоохыг хязгаарлах ажлыг зохион байгуулах

3. Нийтийн эзэмшлийн зам талбайд тээврийн хэрэгслийн төлбөртэй зогсоол байгуулах ажлыг хувийн хэвшлийн хөрөнгө оруулалтаар хийлгэж, зам талбайн ашиглалтыг сайжруулах

4. Гудамж замуудын хөдөлгөөний аюулгүй байдлыг хангах олон нийтийн байцаагч, туслах ажилчдыг явган хүний гарц, зорчих хэсгийн зарим гарцууд дээр ажиллуулах, энэ ажлыг төрийн бус байгууллагуудтай хамтран зохион байгуулах

5. Зам хөндлөн гарч хичээлдээ явдаг сурагч нарт зам тээврийн осол, хэргээс урьдчилан сэргийлэх  зорилгоор цацруулагчтай цүнхний ууттай болгож, зүүж хэвшүүлэх ажлыг зохион байгуулах

6. Энхтайвны өргөн чөлөөний 25 дугаар эмийн сангийн уулзвараас Офицеруудын ордны уулзвар хүртэл,  авто замын зорчих хэсгийн 1-р дүгээр эгнээнд зөвхөн нийтийн тээврийн  үйлчилгээний их багтаамжийн автобус, троллейбусыг явуулах зохион байгуулалтын арга хэмжээ авах

7. Иргэдээс ирүүлсэн санал хүсэлтийн дагуу зарим худалдааны төв зах болон зам дагуу байрлах худалдаа үйлчилгээний газруудын цагийн хуваарьт өөрчлөлт оруулах

8. Улаанбаатар хотын нийтийн тээврийн үйлчилгээний байгууллагуудын гэрээний үүрэг, стандартын шаардлагыг бүрэн хангуулах, сахилга хариуцлага дээшлүүлэх, үйлчилгээний чанар соёлыг сайжруулахад чиглэгдсэн идэвхи санаачлагыг өрнүүлэх ажлыг зохион байгуулах

9. Тээврийн хэрэгслийг улсын дугаараар ангилан замын хөдөлгөөнд оролцуулах ажлыг зохион байгуулах

10. Хотын төвийн ерөнхий боловсролын сургуулиудын хичээл эхлэх болон тарах үеийн замын хөдөлгөөний ачааллыг бууруулах ажлыг зохион байгуулах   гэсэн үндсэн зохион байгуулалтын ажлыг хийхээр төлөвлөөд байсан юм. Төлөөлөгчид энэ төсөлийн зүйл нэг бүр дээр зарчмын саналаа хэлсэн юм.

Ингээд нийслэлийн иргэдийн төлөөлөгчдийн ээлжит бус хоёрдугаар хурлаар энэ асуудлыг хэлэлцээд төлөөлөгчдийн 100 хувийн саналаар замын хөдөлгөөний ачааллыг бууруулах цогц арга хэмжээ дэмжигдлээ. Ингэснээр 8 дугаар сарын 25-наас эхлээд эдгээр зохион байгуулалт хийгдэж эхлэх бөгөөд эхний ээлжинд 2 сарын хугацаанд хэрэгжихээр болж байгаа юм.

Энэхүү тогтоол батлагдсаны дараа НИТХ-ын дарга Д.Баттулга: Бид энэхүү тогтоолыг зарчмын хувьд баталлаа. НИТХ-ын төлөөлөгчдийн шийдвэрээр батлагдсан энэ асуудал ямар нэг шалтгаанаар хэрэгжихгүй бол тухайн албан тушаалтанд хариуцлага тооцох болно, мөн хурлын төлөөлөгчдийн хэлсэн саналыг ажил хэрэгжүүлэх явцдаа тусган ажиллаарай гэдгийг сануулсан. Мөн өнөөдрийн хурлаас гаргасан шийдвэрт НИТХ хяналт тавьж ажиллана гээд НИТХ-ын ээлжит бус II хурал хаасныг мэдэгдлээ.

Ингээд шинэ бүрэлдсэн НИТХ-ын төлөөлөгчид нийтийн тээврийн үйлчилгээг идэвхжүүлэх, замын хөдөлгөөний ачааллыг бууруулах цогц арга хэмжээний төслийг хэлэлцэн баталлаа. 

GoGo Facebook Хуудас

ХОЛБООТОЙ МЭДЭЭ

 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2631 санал өгсөн байна.

Дээшээ