Үндэсний портал GoGo.mn Шилдэг цахим мэдээллийн хуудсаар шалгарлаа

GoGo.mn

2007-12-31 13:44 GMT+8

Хэвлэлийн хүрээлэнгээс хоёр жил тутамд зохион байгуулдаг “Мөнгөн угалз” шилдэг сэтгүүлчдийн сүлд модны наадмаас Үндэсний портал GoGo.mn Шилдэг цахим мэдээллийн хуудсаар шалгарлаа.

 “Мөнгөн угалз” шилдэг сэтгүүлчдийн сүлд модны наадамд УИХ-ын дарга Д.Лүндээжанцан, ЗГЭХГ-ын дарга, ЗТАЖ-ийн сайд Р.Раш нар болон УИХ-ын зарим гишүүн ирсэн байлаа.

“Мөнгөн угалз” наадам Хэвлэлийн Хүрээлэнгээс уншигч, сонсогч, үзэгч, хэрэглэгчдийн дунд явуулсан бүтэн жилийн судалгааны дүнгээр шилдэг телевиз, сонин, сэтгүүл, цахим мэдээллийн хуудсыг шалгарууллаа. 2007 оны шилдэг телевиз МҮОНТ, 2007 оны шилдэг мэдээллийн хөтөлбөртэй телевизээр TV9, шилдэг шинэ телевизээр NTV, 2007 оны үзэгчдийн таашаал хүртсэн хамгийн их нэвтрүүлэгтэй телевизээр "MN 25-р суваг" телевиз шалгарлаа.

Харин Шилдэг радиогоор Монголд үйл ажиллагаа явуулж байгаа жар гаруй радиогоос Монголын Үндэсний Олон нийтийн Радио шалгарсан юм. Нийслэлийн хэмжээнд нэвтрүүлгээ цацдаг хорь гаруй богино долгионы радионоос Шилдэг менежменттэй хэмээх өргөмжлөлийг FM 100,1 хүртэж, Шилдэгээр 101,7 FM шалгарлаа.

Шилдэг өдөр тутмын сонингоор “Өнөөдөр” тодорч, Шилдэг сэтгүүлийн өргөмжлөлийг “Гялбаа” хүртлээ.

Олны таашаалд нийцсэн уран бүтээл төрүүлж, шилдэг сэтгүүлч хэмээх өргөмжлөлийг хүртсэн хүмүүс бол “Өдрийн сонин”-ы сэтгүүлч Золбаяр, МОНЦАМЭ агентлагийн сэтгүүлч Элбэгзаяа нар байлаа. Харин шилдэг фото сурвалжлагчаар “Ардын эрх” сонины зурагчин Гэрэлсайхан шалгарсан юм.

Ийнхүү нийгмийн бүхий л салбарууд өөрсдийн шилдгүүдээ шалгарууллаа. Манай Үндэсний портал GoGo.mn байгуулагдаад удаагүй ч 2007 онд олны таашаалд шилдэгийн шилдэг болтлоо хүрч чадсандаа баяртай байна. Энэ бол дан ганц бидний амжилт бус манай сайттай хамтран ажилладаг нэр бүхий байгууллагууд, хэрэглэгч та бүхний амжилт мөн билээ.

О.Ариунбилэг

GoGo Facebook Хуудас
 
 
Төсвийн хэмнэлт эдийн засаг тогтворжиход нөлөөлж чадах уу ?
Нийт 3208 санал өгсөн байна.

Дээшээ