Уул уурхайн бүтээгдэхүүний жишиг үнийг танилцууллаа

BloombergTV.mn

2017-01-12 12:05 GMT+8

Экспортод гаргаж байгаа уул уурхайн бүтээгдэхүүний олон улсын зах зээлийн 12 дугаар сарын дундаж жишиг үнийг Сангийн яам танилцууллаа. Үүнд Лондоны Металлын биржийн ханшаар нэг тонн зэсийг 5665 орчим ам.доллар байхаар тооцсон байна. Өнгөрсөн 12 дугаар сард зэсийн гол экспортлогч “Оюу Толгой” компани Ганц модны боомтод гарсан өөрчлөлттэй холбоотойгоор тээвэрлэлтээ долоо хоног зогсоосон юм.

Энэ хооронд ойролцоогоор 20 сая ам.долларын зэсийн баяжмалын борлуулалт зогсож, улсад төлөх ёстой 1.3 сая ам.долларын татварын орлого тасалджээ. Өнгөрсөн онд “Оюу Толгой” компани улсад 300 тэрбум төгрөгийн татвар төлсөн гэдгийг “Эрдэнэс Оюу Толгой” компани мэдээлсэн юм. Харин 2017 онд “Оюу Толгой”-оос 130-160 мянган тонн зэсийн агууламж бүхий баяжмал, 100-140 мянган унц алтны агууламж бүхий баяжмал үйлдвэрлэхээр төлөвлөж байна.

Сангийн яамны тооцоолсон жишиг үнийг харвал голлох металлуудаас хар тугалга нэг тонн нь 2230 ам.доллар, хөнгөн цагаан 1730 ам.доллар, цагаан тугалга 21274 ам.долларын ханштай байгаа юм. Харин боловсруулаагүй нүүрсний үнслэг чанар нь 12.5 хувиас, дэгдэмхий чанар нь 28 хувиас бага коксжих нүүрсний ханшийг нэг тонн тутамд нь 135.8 ам.доллараар тооцжээ. Мөн дэгдэмхий чанар нь найман хувиас, үнслэг чанар нь 25 хувиас бага нүүрсний ханшийг нэг тонн тутамд нь 91.39 ам.доллараар тооцсон байна.

12 дугаар сарын нэгнээс БНХАУ-ын тал Ганц модны боомтоор нэвтэрч байгаа нүүрсний тонн тутмаас найман юань,автомашин тутмаас 10 юанийн хураамж авах шийдвэр гаргасан юм. Үүнээс хамаарч уурхайн аман дээр нүүрсний үнэ нэг тонн тутамдаа 0.9 ам.доллараар буурах тооцоо гарсан байна. Энэ нь “Эрдэнэс Таван Толгой”-ийн хувьд баруун Цанхийн нүүрсэд хамааралтай гэж тус компаниас мэдээллээ.

Т.Элиса

GoGo Facebook Хуудас
 
 
МАН-ын даргад эдгээр хүмүүсийн хэнийг нь та дэмжих вэ?
Нийт 1401 санал өгсөн байна.

Дээшээ