Туркийн томоохон төсөл хэрэгжүүлсэн туршлагаас суралцана

Сэтгүүлч Б.Эрдэнэчимэг

2017-03-17 17:40 GMT+8

Зам, тээврийн хөгжлийн сайд Д.Ганбат Бүгд Найрамдах Турк Улсаас Монгол Улсад суугаа Онц бөгөөд Бүрэн Эрхт Элчин сайд Ахмет Язалыг хүлээн авч, хоёр улсын тээврийн салбар дахь хамтын ажиллагааны асуудлуудаар санал солилцлоо.

Хоёр улсын эдийн засгийн хамтын ажиллагаанд зам, тээврийн салбарын хамтын ажиллагаа чухал байр эзэлдэг. 1994 оноос хойш Туркийн олон улсын хамтын ажиллагааны байгууллагаас Монгол Улстай хамтын ажиллагаа өрнүүлсэн талаар онцолж байв.

Турк Улс сүүлийн жилүүдэд Ази-Европыг холбосон тээврийн холбоосыг хөгжүүлэх зорилготой томоохон бүтээн байгуулалтын ажлуудыг амжилттай хэрэгжүүлж байгаа аж. Тухайлбал Босфорын хоолой дээгүүр болон доогуур гүүр, төмөр замын хонгил ашиглалтад оруулсан. Том төслүүд төлөвлөж хэрэгжүүлэх талаар ихээхэн туршлага хуримтлуулсан тул энэ чиглэлийн туршлагаас хуваалцахад дэмжиж ажиллахыг салбарын сайд хүслээ.

Элчин сайд Ахмет Язал зам, тээврийн салбар дахь хамтын ажиллагааг хөгжүүлэхэд анхаарч, идэвхтэй хамтран ажиллахаа уулзалтын үеэр онцоллоо. Тэрээр эртний түүхэн уламжлалт харилцаа өнөө цагт улам хөгжиж байгааг дурдаад “Монголчууд бол түүхийн эхлэл юм. Эрт цагийн анд нөхөд, хөршүүд тул улс төр, нийгмийн салбарт одоо ч сайн харилцаатай байсаар байна.

Тиймээс Турк Улсаас Монгол Улсыг зорих жуулчдын тоог нэмэх сонирхолтой байгаа тул худалдаа, эдийн засгийн харилцааг илүү сайжруулах шаардлагатай байна” гэлээ. Цаашид Монгол Улсын Зам, тээврийн хөгжлийн яамнаас хэрэгжүүлэх хөгжлийн төсөл хөтөлбөрүүдийн мэдээллийг ижил газар зүйн байршилтай хөрш орнуудад сурталчлан таниулж, хөрөнгө оруулалтын чиглэлээр хамтарч ажиллахаа илэрхийлэв.

GoGo Facebook Хуудас
 
 
Та шинэчлэн найруулсан зөрчлийн тухай хуулийн талаар хэр мэдээлэлтэй байна вэ?
Нийт 96 санал өгсөн байна.

Дээшээ