Ерөнхийлөгч Х.Баттулгын бүрэн эрхийг УИХ-ын 57 гишүүнээс 55 нь дэмжив

Б.Чимэг GoGo.mn

2017-07-10 12:11 GMT+8

УИХ-ын ээлжит бус чуулган Төрийн ордонд болж байна. Хуралдаанаар Ерөнхийлөгчийн сонгуулийн үр дүнг хүлээн зөвшөөрөх эсэх буюу Х.Баттулга ерөнхийлөгчийн бүрэн эрхийг хүлээн зөвшөөрөх эсэхийг хэлэлцэж байна.

Хугацаагаар эрэмбэлэж харах :
00:58 2017-08-29

Чуулганы ирц 73.7 хувь байв.  

Гэрэл зургийг Б.Бямба-Очир

00:58 2017-08-29

УИХ-ын гишүүн О.Баасанхүү: Азаар сонгууль хурдан дууслаа. Удаан үргэлжилсэн бол нэр дэвшигчид эдийн засаг, улс орноороо тоглоод дуусах байлаа. Сонгуулийн үр дүн бол М.Энхболдод биш, МАН-д өгсөн дүн шүү. Та нар нэр дэвшигчийнхээ эсрэг ажилласан. Нэг байр сууринаасаа олон дахин ухарсан. Төр урагшаа явах ёстой. Хагарал бутралаа хойш нь тавья. Үндсэн хуульд оруулах өөрчлөлтөө хурдавчилъя. Ерөнхийлөгчийн насыг 60 хүргэн өсгөх хэрэгтэй. Залуу хүн Ерөнхийлөгч болох нь уршигтай. Суудлаасаа буугаад бужигнаан үүсгэдэг, хор хутгадаг.

Сонгуулийн хууль зөрчин, тараасан мөнгөөр цэцэрлэг барья.  АН-аас 1 тэрбум, МАХН-аас 60 сая вон ирэх юм шиг байна. Та нар дахин сонгууль болсон мэт ярих хэрэггүй. Дахин санал хураалт болсон юм шүү.       

00:58 2017-08-29

УИХ-ын гишүүн С.Жавхлан: Шинэ Ерөнхийлөгч нам руугаа бус түмэн олон руугаа гүйдэг байгаасай. Олны хүч оломгүй далай гэдгийг бид сая хардаа. Шинэ Ерөнхийлөгч эх орончидтой нэгдэнэ гэж найдаж байна. Хэрүүл биш хурал хийдэг УИХ-тай болмоор байна. Хуулиа дээдэлдэггүй УИХ-ыг тараахыг албан ёсоор хүснэ. Өр тавьдаггүй, авлига авдаггүй Засгийн газартай болмоор байна. Залуу хүний хувьд Монголыг өөрчлөх хүч бидэнд байна гэж хэлье.       

00:58 2017-08-29

УИХ-ын гишүүн С.Эрдэнэ: Хуулийн цоорхой өмнө ч байсан. Хэрэв та нар Сонгуулийн тухай хуулийг будлиантай гэж үзэж байгаа бол энд сууж буй 76 гишүүн УИХ-ын гишүүд биш. Учир нь та нар энэ хуулиар энэ танхимд орж ирсэн. Биднийг ард түмэн шүүнэ. Хэн мөнгө тараасан, хэн будлиан үүсгэснийг олон нийт л шүүнэ. Хуулийнхан ч шалгаж тогтооно биз. Хэрэг хуучирдаггүй. Шүүхээр тогтоогоогүй байхад гэм буруутай мэтээр, сэжигтэн ярьж байгаад харамсаж байна. Үндсэн хуулийн энэ заалтыг захын хуульч  мэднэ. Сонгууль дууссан байтал хар үг хэлж, баярын босгон дээр ийм зүйл ярих хэрэггүй. 

Шинэ Ерөнхийлөгчийг хүлээн зөвшөөрөх нь бидний үүрэг. Асуудлаа шийдээд явах нь зөв. 

УИХ-ын гишүүд үг хэлж дууслаа. Х.Баттулга гишүүний бүрэн эрхийг баталъя гэсэн томьёолоор санал хураахад 57 гишүүнээс 55 гишүүн зөвшөөрлөө.  

00:58 2017-08-29

Төрийн байгуулалтын байнгын хорооны дарга Н.Энхболд Ерөнхийлөгчийн тангараг өргөх цаг 11.40 байсныг 12.10 болгон өөрчлөх санал гаргав.

УИХ-ын гишүүн Ц.Даваасүрэн: Ард түмний сонголт учраас бид шинэ Ерөнхийлөгчийг хүлээн зөвшөөрөх нь зөв. Гэвч энэ сонгууль бидэнд гар утас бол тагнуулын хэрэгсэл болжээ гэдгийг батлан харууллаа. Хүн хүнтэйгээ нүүр тулаад сайхан ярилцах боломжгүй болжээ. Сонгуулийн энэ мэт хор уршгийг засах ёстой. Ард түмэн амлалтад биш, амлалтаа биелүүлж байгаа эсэхэд анхаардаг болжээ.

УИХ Ерөнхийлөгчөө "нухчих" вий гэсэн төрийн хямралаас олон нийт эмээж байна. Өмнөх Ерөнхийлөгч шигээ АТГ-ын даргаа битгий шоронд оруулаарай гэж шинэ Ерөнхийлөгчид хэлмээр байна.

Эрх мэдлийн төлөө улайрвал УИХ эрхээ эдлэх ёстой. Улс орноо хөгжүүлэхэд л анхаараарай. Харин хүчний байгууллагуудын дарга нарын томилгооны төлөө бүү ажиллаасай. Хоёр дахь санал хураалтад ард түмний тал нь ирээгүйг бас анхаараарай. Ажилд нь амжилт хүсье.          

00:58 2017-08-29

УИХ-ын гишүүн Д.Тэрбишдагва: Шинэ Ерөнхийлөгч одоо тангаргаа өргөнө. Та эв нэгдлийн бэлэг тэмдэг юм шүү. Тангаргийн үгс их гүн утгатай. Үг бүрийг та чээжлээрэй. Нийт сонгогчдын 32 хувь нь таныг дэмжлээ. Үлдсэн хэсэг нь ч Монголчууд тул тэднийг үл ойшооож болохгүй. Монголчууд хагалан бутарсан үедээ яаж хүчээ алдсаныг бид мэднэ. УИХ өнөөдөр их өгөөмөр хандан, наадмаа шинэ Ерөнхийлөгчөөр нээлгэх хүсэлтэй байна.

Энэ удаагийн сонгууль Монголд ер нь зөв хүн байна уу гэж бодоход хүргэлээ. Иймд Ерөнхийлөгч та их болгоомжтой байгаарай. Монголчууд үзэл бодлоо 20 мянган төгрөгөөр худалддаг ёс суртахуунгүй хүмүүс биш. Харилцан бие биенээ гүтгэсэн сонгууль боллоо. Нэг л биш болчихлоо. Монгол Улсын язгуур эрх ашиг гэж бий. Иргэн хүн бол иргэн тул яс үндэс, гарал угсаагаар цаашид бүү хуваагаарай. Танаас тангаргаа хэрхэн биелүүлэхийг шахаж шаардаж ажиллана.         

00:58 2017-08-29

УИХ-ын гишүүн Б.Бат-Эрдэнэ: Бид төрийн далбааны хүндэтгэлийн ёслолыг хоёр янзаар бэлдлээ шүү дээ. Энэ мэтээр цагаа эртхэн товлох шаардлагатай байна. Тангараг өргөх ёслол 11.40-д гэсэн боловч бас л хойшиллоо. Сонгуулийн гүжирдлэгээс болж төрийн нэр хүнд их уналаа. Уг нь хамгийн нэр бүтэн нь Ерөнхийлөгч байлаа шүү дээ. Ерөнхийлөгч бидний шүтээн байх учиртай. 2013 оны Ерөнхийлөгчийн сонгуулийн үеэр бас л их гаарсан ч сая утгаа алдлаа.

Хүмүүс телевизээ үзэхийг биш хаах хүсэлтэй болж байна. Үндэсний аюулгүй байдлаа атгуулах хүнээ бид ийм байдалтай сонгож байна. 2021 он мөдхан хаяанд ирчихнэ. Улс төрийн намууд битгий Ерөнхийлөгчийн тал талаас нь чангаагаарай.      

УИХ-ын гишүүд үг хэлж дууслаа. Ингээд Ерөнхийлөгчийн тангараг өргөх товыг баталъя гэж санал хураахад дийлэнх гишүүн дэмжлээ. Тангараг өргөх цагийг 12.30 гэж тогтоов. 

УИХ-ын чуулганы ээлжит бус хуралдаан өндөрлөлөө.

00:58 2017-08-29
1 | 7 фото
1
1
1
1
1
1
1
00:58 2017-08-29

УИХ-ын ээлжит бус чуулган Төрийн ордонд болж байна. Хуралдаанаар Ерөнхийлөгчийн сонгуулийн үр дүнг хүлээн зөвшөөрөх эсэх буюу Х.Баттулга ерөнхийлөгчийн бүрэн эрхийг хүлээн зөвшөөрөх эсэхийг хэлэлцэж байна. УИХ-ын гишүүд үг хэлж байна. 

УИХ-ын гишүүн Н.Цэрэнбат: Ерөнхийлөгч бүх ард түмний эв нэгдлийн бэлэг тэмдэг атал үүний яг эсрэг хүн Ерөнхийлөгч боллоо. СЕХ хатууд нь хатуу, зөвд нь зөв байх хэрэгтэй. Үндсэн хуулийн хууль дээдлэх ёс хаачсан бэ? Сонгуулийн тухай хуулийн олон заалтыг зөрчсөн байтал сонгууль шударга боллоо гэх юм. Шударга биш байсныг ард түмэн мэднэ.    

УИХ-ын гишүүн Ж.Мөнхбат: Олон талаараа анхдагч сонгууль боллоо. Анх удаа 2 шатлалтай сонгууль боллоо. Анх удаа маш их хар мэдээг цацлаа. Анх удаа гэмт хэрэгт сэжиглэгдсэн хүн Монгол Улсын Ерөнхийлөгч боллоо.

Сонгууль дууслаа. Амьдрал цааш үргэлжилнэ. Наадмын дараа намар гэдэг.  Үе үеийн ерөнхийлөгч нар эрх мэдлээ өргөтгөх оролдлогыг хийсээр ирсэн тул Монгол Улс Ерөнхийлөгчийн засаглалтай мэтээр хүмүүс ойлгох боллоо. Монгол хуультай, төртэй улс бол сонгуулийн хуулиа цэгцлэх цаг болжээ. Эхний шатны сонгуулийн маргааныг шүүх шийдвэрлээгүй байхад дараагийн санал хураалт болж өнгөрлөө. Ийм учраас сонгуулийн ирц буурсан байна. Үндсэн хуульд яаралтай өөрчлөлт хийх цаг болжээ.   

00:58 2017-08-29

УИХ-ын гишүүн А.Сүхбат: Х.Баттулгын сонгуулийн штабын ажилтнууд 1 тэрбум төгрөгийг бэлнээр авч явсан нь илэрсэн. Энэ хэргийг шалгах хэрэгтэй.  Их муухай сонгууль боллоо. Танай манай гэлтгүй мөнгө тараалаа. 2021 оны сонгууль ийм болох уу? Иргэд мөнгө авч, саналаа өгдөг үе өнгөрчээ.  

00:58 2017-08-29

СЕХ-ны дарга Ч.Содномцэрэн: 25 мянган төрийн албан хаагч сонгуулийн үеэр ажилласан. Тэд бүгд шударга ажилласан. Анх 7-ны өдөр гэж товлосон ч 9 болгож хойшлуулсан нь гадаад дахь иргэдийн саналыг авах бэлтгэл ажил бүрэн хангагдаагүй байсантай холбоотой. Тэдний саналыг аваад онгоцоор нааш нь илгээхэд нислэгийн өдөр, цагт тааруулах шаардлага тулгарсан.      

9-ний өдөр дахин санал хураах шийдвэрийг бид хамтын шийдвэрээр гаргасан. 

00:58 2017-08-29

УИХ-ын гишүүн Занданшатар: Олон улсын ажиглагчид Ерөнхийлөгчийн сонгууль замбараагүй орчинд болж өнгөрлөө гэж дүгнэж байна. Ард түмний төрд итгэх итгэл суларсныг хаа хаанаа анхаарах ёстой. Эрх мэдлийн тэмцэл, хуваарилалтын талаар Үндсэн хуульд оруулах өөрчлөлтдөө тусгах нь зөв. Энэ талаар СЕХ ямар байр суурьтай байна вэ?     

00:58 2017-08-29

СЕХ-ны дарга Ч.Содномцэрэн: Сонгуулийн тухай хуульд хоёр дахь шатны санал хураалтын талаар дэлгэрэнгүй заалт байхгүй.  

Төрийн байгуулалтын байнгын хорооны дарга Н.Энхболд: Бид өмнө нь хоёр дахь шатны санал хураалтыг илүү боловсронгуй болгох талаар ярьж байсан ч УИХ-ын гишүүд дэмжээгүй. Энэ нь буруу байсныг одоо ойлгож байгаа биз. Ер нь Сонгуулийн тухай хуулийг задлах, тухайлсан хууль гаргах хэрэгтэй. Хоёр шаттай сонгууль болбол УИХ тухайн үед нь хууль гаргах нь буруу. Хоёр дахь шатны санал хураалт хүртэл нэр дэвшигчид хууль зөрчвөл яах вэ гэдгийг заах ёстой. 

GoGo Facebook Хуудас
 
 
Дараагийн Ерөнхий сайд хэн болоосой гэж та хүсч байна вэ?
Нийт 5158 санал өгсөн байна.

Дээшээ