Түймэр унтраахад дэмжлэг үзүүлж, хандив өргөсөөр байна

Б.Чимэг GoGo.mn

2017-07-17 09:50 GMT+8
Нийгмийн ардчилал, Монголын залуучуудын холбооны хандивыг УИХ-ын гишүүн Г.Тэмүүлэн гардуулав.

Манай орны төвийн бүсэд гарсан гал түймрийг унтраахаар ОБЕГ-ын алба хаагчид олон хоногийн турш ажиллаж байна.

Төв аймгийн Батсүмбэр сум нийслэлээс 80 орчим, Сэлэнгэ аймгийн Түнхэл сум 150 км-ийн зайтай. Гэвч эдгээр аймгуудад гарсан түймрийн утаа нийслэлийг бүрхээд олон хонолоо. Иймд иргэд, ААН-үүд, ТББ-ууд сайн дураараа нэгдэн, гал сөнөөгчдөд тусламж илгээсээр байна.

Өнөөдөр Нийгмийн ардчилал, Монголын залуучуудын холбоо ОБЕГ-т гишүүдээсээ цуглуулсан 7 сая төгрөгийг гардууллаа. Тэд энэ хандивыг нэг хоногийн хугацаанд цуглуулсан байна. Мөн

  • "Мобиком" корпораци нийт 32 сая төгрөгийн гал унтраах төхөөрөмж,  
  • Юнител групп бэлэн болон бэлэн бусаар нийт 35 сая, 
  • АПУ ХК 50 сая төгрөгийн үнэ бүхий цэвэр ус, сүүн бүтээгдэхүүн,
  • "Шунхлай" групп 20 сая төгрөгийн шатахууны тусламж үзүүлж, 
  • Хаан банк 10 сая, 
  • МИК ОССК ХХК 10 сая,
  • "Алтан Дорнод Монгол" компани мөн 10 сая,
  • Ариг Банк 4.7 сая хандивлан,    
  • “Томас Айр” агаарын тээврийн компани үнэ төлбөргүй нислэг үйлдэн, галын голомттой газруудад ус цацахаар болжээ. 

  • “Эрдэнэс-Таван толгой” компанийн ажилтнууд нэг өдрийн цалингаа хандивлан, усны сав, явуулын эмийн сан, хоол хүнс болон 5000 ширхэг амны хаалт хандивлахаар бэлтгэл ажлаа хангаж байна.
  • Хууль зүй дотоод хэргийн салбарын 30 мянган ажилтан албан хаагч эх орноо гал түймрийн аюулаас аврах үйлсэд зориулж нэг өдрийн цалингаа хандивлахаар болжээ.

ОРОН НУТГИЙН ИРГЭДИЙН ӨГСӨН ХАНДИВ

  • Дорноговь аймгийн Сайншанд сумын ЗДТГ-ын хамт олон 400 мянга, Сайншанд өртөөний хамт олон нэг сая, Айраг сумын ИТХ-ын төлөөлөгчид 250 мянга, Ш.Очирсүх захиралтай “Их-Уулын говь” ХХК-ийн хамт олон 100 мянган төгрөг, Аймгийн МСҮТ 50 мянган төгрөг, Дорноговьчууд "Эх орноо гал түймрээс аваръя аян"-нд нэгдэж, 2.700.000 төгрөгийг хуримтлуулжээ.
  • Мөн Баялаг бүтээгчдийн холбооны Сүхбаатар аймаг дахь салбараас 346 200 төгрөг, иргэд нэг кроп цэвэр усыг  хандивлажээ. 
  • Дархан хотын залуус аймгийн Холбооны газрыйн өмнө цугларч нийт иргэдийг уриалж хандив цуглуулж эхэлжээ. 

Эдгээрийг нэн шаардлагатай байгаа, зориулалтын нисдэг тэрэг худалдан авахад зарцуулна гэдгээ ОБЕГ-ын удирддлагууд мэдэгдсэн. Агаараас ус цацаж, ой хээрийн түймэр унтраах нисдэг тэрэг 5-10 сая ам.долларын үнэтэй. Өчигдөр 100 орчим сая төгрөгийн тусламж цугларсан юм.        

Иргэд ч өөр өөрсдийн боломжоор хандив цуглуулан, гал сөнөөгчдөд хүлээлгэн өгсөөр байна. Төв аймгийн Батсүмбэр сумын ЗДТГ-ын гадна цуглуулсан тусламжийн эд зүйлсээ ОБЕГ-ынханд хүлээлгэн өгөхөөр олон иргэн ирсэн байв.        

GoGo Facebook Хуудас
 
 
Дараагийн Ерөнхий сайд хэн болоосой гэж та хүсч байна вэ?
Нийт 3784 санал өгсөн байна.

Дээшээ