Б.Чойжилсүрэн: Төсөвт тодотгол оруулбал Хүүхдийн мөнгийг үргэлжлүүлэн олгоно

Г.Билгүүн GoGo.mn

2017-09-15 08:07 GMT+8

Ж.Эрдэнэбатын Засгийн газар огцорсноор Монгол Улсад хэрэгжиж буй ОУВС-гийн “Өргөтгөсөн санхүүжилтийн хөтөлбөр” зогсох магадлалтай болсон талаар мэдээлэл гарч эхлээд байна. Мөн 2017 оны Төсвийн тодотгол зайлшгүй хийх шаардлага үүсээд байаа юм.  Энэ талаар Сангийн сайдын үүрэг гүйцэтгэгч Б.Чойжилсүрэнгээс тодруулсан юм.  

-ОУВС-гийн хөтөлбөр зогсоно гэсэн мэдээлэл байна. Энэ хөтөлбөр үргэлжлэх боломжтой юу?
-ОУВС-гийн хөтөлбөрийг үргэлжлэх эсэхийг ОУВС-гийн төлөөлөгчид Монгол Улсад ирээд дараагийн Ерөнхий сайдтай уулзаж байж тодруулах байх.

-Одоогийн байдлаар хэр хэмжээний санхүүжилт энэ хөтөлбөрөөр орж ирээд байгаа вэ? Энэ онд багтаагаад орж ирэх өөр санхүүжилт байна уу?
-ОУВС-гийн санхүүжилт бол багц санхүүжилт. Энэ хүрээнд Азийн хөгжлийн банк жишээлбэл 250 сая ам.доллар өгөхөөс эхний 100 сая ам.доллар ороод ирчихсэн. Дараагийн 100 сая ам.долларын хэлэлцээр одоо явагдаж байна. Хэлэлцээрийг амжилттай явуулбал 10 дугаар сарын дундуур 100 сая ам.доллар, 12 дугаар сард 50 сая ам.доллар авна.  Дэлхийн банкны тухайд энэ оны дөрөвдүгээр улиралд багтаагаад 100 сая ам.доллар авах урьдчилсан хэлэлцээр явж байсан. Энэ хэлэлцээр одоохондоо зогсоогүй байна.

-Улсын төсөв ямаршуухан байна вэ?
-Төсвийн орлого төлөвлөснөөсөө 300 орчим тэрбум төгрөгөөр давж биелж байгаа. Өнгөрсөн оны мөн үеийнхтэй харьцуулахад 1 их наяд төгрөгөөр давж байна.

-Хүүхдийн мөнгийг үргэлжлүүлж олгох боломж байна уу?
-Дөрөвдүгээр сарын 14-нд Төсвийн тодотгол батлахдаа 161 тэрбум 520 сая төгрөг баталсан. Үүнийг бүгдийг нь олгочихсон байгаа. Есдүгээр сарын мөнгийг олгохын тулд үлдсэн 110 тэрбум орчим төгрөгийг Төсөвт тодотгол оруулж байж олгохоор байгаа.

-Ирэх оны Төсвийг хэлэлцэж эхлэхээс өмнө заавал энэ оны төсвийг засварлах шаардлага гарсан юм уу?
-2017 оны Төсвийн тодотгол, 2018 оны Төсвийг 10 дугаар сарын 1 гэхэд багтаан УИХ-д багтаан өргөн барихаар төлөвлөөд явж байна. Анх удаа Төсвийн орлого давсан учир 510 тэрбум төгрөгийг эхний ээлжинд  нэн тэргүүнд тулгамдаад байгаа Хүүхдийн мөнгө зэрэгт хуваарилахаар Төсвийн тодотгол хийж байна.

GoGo Facebook Хуудас
 
 
Дараагийн Ерөнхий сайд хэн болоосой гэж та хүсч байна вэ?
Нийт 4266 санал өгсөн байна.

Дээшээ