Монгол Улсын Ерөнхийлөгч Монгол Улсын Казах иргэдийн Наурыз баярыг тохиолдуулан мэндчилгээ дэвшүүлж байна

Монгол Улсын казах иргэд ээ,
Эрхэм хүндэт нөхөд өө,

Өвлийг өнөтэй тэнхлүүн давж, урин дулаан хавартай учран золгож буйг бэлгэдэн өдөр, шөнө тэнцсэн тэгш сайн өдөр өргөн түмнээрээ эв эеээ хичээж, ёс төртэй, өргөн дэлгэр тэмдэглэдэг казах түмний үндэсний уламжлалт баяр Наурызыг тохиолдуулан эх орны дөрвөн зүг, найман зовхист аж төрж, амьдран суугаа нийт казах иргэд Та бүхэнд чин сэтгэлийн халуун мэндчилгээ дэвшүүлж, хүн бүхэнд эрүүл энх, айл өрх бүрт аз жаргал, сайн сайхныг хүсэн ерөөе.

Өнө эртнээс уламжлалтай Наурыз баярын энэхүү бэлэг дэмбэрэлт өдөр нийт казах иргэд Та бүхэн хотол даяараа амар мэндээ мэдэлцэж, азай буурал аксакалуудаа өргөө гэрийнхээ хойморт хүндлэн залж, үнэт сургаалыг нь сонсч, улс орон, ард түмнийхээ амьдрал байдал, аймаг, орон нутгийнхаа ажил хэргийг шинжин ярилцаж, цаашдын хөдөлмөр бүтээлээ хэлэлцэн тодорхойлж, ёс төгөлдөр баясан цэнгэж байгаа гэдэгт Монгол Төрийн тэргүүн би итгэлтэй байна.

Улс орон, ус нутаг нэгтэй үе үеийн ажилч хичээнгүй, авъяаслаг, хөдөлмөрч казахын ард түмэн Монгол Улсын тусгаар тогтнол, хөгжил дэвшил, бүтээн байгуулалтын ариун үйлсэд ихээхэн хувь нэмэр оруулсаар ирсэн бөгөөд улс орондоо нэртэй, удам хойчдоо хүндтэй төр, нийгмийн зүтгэлтнүүд, боловсрол, урлаг соёлын алдартнууд, шинжлэх ухааны эрдэмтэн мэргэд, хөдөлмөр бүтээлийн сайчууд казах иргэдийн дундаас олноор төрөн гарсныг баярын энэ өдөр бахархан тэмдэглэхэд таатай байна. Өвөг дээдсийнхээ удмыг залгаж, ухааныг өвлөсөн өнөөгийн казах иргэд эрдэнэт мал сүргээ өсгөн үржүүлж, үйлдвэр, үйлчилгээгээ өргөжүүлэн хөгжүүлж, эрдэм мэдлэг, авъяас чадвараа дээшлүүлэн, өв соёл, ёс заншлаа шинэ агуулга, хэлбэрээр гүнзгийрүүлэн баяжуулах, улс орон, үндэстний тогтвортой хөгжлийг хангах талаар идэвх санаачилга, хичээл зүтгэлтэй ажиллаж, ихийг бүтээж байгаа нь сайшаалтай. Манай орны казах иргэд өөрсдийн нөөц боломжоо дайчлан хичээл зүтгэлтэй ажиллаж, ахмад үеийнхээ хөдөлмөрч уламжлалыг үргэлжлүүлэн улс орноо хөгжүүлэх, аж амьдралаа дээшлүүлэхэд цаашид ч их зүйлийг хийнэ гэдэгт миний бие итгэл төгс байна.

Хувь ерөөлтэй хулгана жилийн босгон дээр Монгол Улсын Ерөнхийлөгчийн санаачилж, Засгийн газрын боловсруулсан “Монгол Улсын Мянганы хөгжлийн зорилтод суурилсан Үндэсний хөгжлийн цогц бодлого”-ыг УИХ-аас баталсан нь хөгжлийн алсын хараа, бодлого, зорилтгүй явж ирсэн манай орны хувьд түүхэн чухал үйл явдал боллоо. Миний бие Монгол Улсын хөгжлийн хэтийн зорилтуудыг тусгасан уг баримт бичгийг хураангуйлан “Гурван арван тав” хэмээн тодорхойлж  байгаа.

Үндэсний хөгжлийн цогц бодлогыг хэрэгжүүлэхэд нэг иргэнээсээ эхлээд нийт ард түмнээрээ идэвхи зүтгэлтэй оролцох ёстой. Ингэж байж л бид цаасан дээрх цогц бодлогыг амьдрал дээр цогц хөгжил болгож, арван таван жилийн дараа нэг хүнд жилд 15000 мянган ам. долларын дотоодын нийт бүтээгдэхүүн ногддог, эдийн засаг нь жилд дунджаар 15 хувь өсдөг улс орныг бүтээн байгуулж, түүнийхээ үр шимийг хүртэх болно. Үүнд Монгол Улсын Баруун бүс нутагт ажиллаж, амьдарч буй иргэд ялангуяа казах иргэдийн үүрэг, оролцоо нэн чухал байх нь ойлгомжтой.

Наурыз баяр бол монголын казах иргэд уугуул ёс заншил, хэл, соёлоо хадгалж чадсаны нэг чухал үзүүлэлт бөгөөд сүүлийн жилүүдэд уламжлалт ёс заншил, баяр наадмаа улам өргөн дэлгэр тэмдэглэж, олон түмэнд сурталчлан таниулахад идэвх санаачилгатай ажиллаж байна. Үүний нэг тод илрэл бол саяхан  Казахын холбооноос санаачлан “Бүргэдийн баяр”-ыг Улаанбаатар хотод зохион байгуулж, зоригт кыран бүргэдийн гайхамшгийг түмэн олонд сонирхуулсан явдал юм. Цаашид “Бүргэдийн баяр”-ыг уламжлал болгон жил бүр зохион байгуулахаар болсныг уг баярт оролцсон Ерөнхийлөгч миний бие дэмжиж байгаа бөгөөд энэ нь казахын ард түмний уламжлалт ёс заншлыг олон нийтэд сурталчлан таниулсан соёлын  өвөрмөц нэгэн үзэгдэл байх болно.

Казах түмний хэл соёл, шашин шүтлэг, ёс заншил болон казах иргэдийн олонхи амьдардаг Баян-Өлгий аймгийн нийгэм, эдийн засаг, хөгжил дэвшлийн аливаа асуудал манай төр, засгийн анхаарлын төвд байсаар ирсэн билээ. Ажилгүйдэл, ядуурлыг бууруулах, амьжиргааны түвшинг дээшлүүлэх, ажлын байрыг шинээр бий болгох, аймгийн дэд бүтцийг хөгжүүлэх, эрчим хүчний найдвартай эх үүсвэрийг бий болгох, жижиг дунд бизнесийг хөгжүүлэхэд төр, засгийн зүгээс илүү их анхаарах шаардлагатай байна. Удахгүй Дөргөний УЦСтанц ашиглалтанд орж, эдгээр асуудлуудаас шийдвэрлэгдэнэ гэдэгт итгэж байна. Аймгийг хөгжүүлэхэд төр, засгийн тус дэмжлэгээс гадна казах түмний маань эв нэгдэл, идэвх чармайлт, холч мэргэн санаа, хөдөлмөр зүтгэл, бүтээлч санаачилга шийдвэрлэх үүрэгтэй гэдгийг онцлон тэмдэглэхийг хүсч байна.

Эрхэм хүндэт казах иргэдээ!

Аливаа баяр нь өнгөрсөнд алдаж оносноо цэгнэн, ухаарлын сургамж авч, ирээдүй рүү тэмүүлсэн хийж  бүтээх, сайн сайхан амьдрах хүсэл зорилго,  итгэл найдвараа бэхжүүлэх утга учир, бэлэг дэмбэрлийг агуулдаг билээ. Хулгана жил манай орны улс төр, нийгмийн амьдралын хувьд ихээхэн хариуцлагатай жил болно. Тодруулбал төрийн эрх барих дээд байгууллага - УИХ-ыг сонгох хариуцлагатай цаг үе тулж ирээд байна. Шинээр бүрэлдэх парламентийн чанар чансаа, үйл ажиллагаанаас төрийн тогтвортой байдал, улс орны ирээдүйн хөгжил дэвшил ихээхэн шалтгаалах учир Та бүхний оновчтой сонголт чухал гэдгийг онцлон хэлэхийг хүсч байна.

Наурыз баяраа хамтдаа угтаж, халуун бүлээрээ цугларан амжилт бүтээл, аз жаргал, хөөр баяслаар дүүрэн тэмдэглэж буй Та бүхэндээ шинэ ондоо цог золбоотой, өнгө жавхаатай, аз хийморьтой, амжилт бүтээл арвин байхын ерөөл талбия.

Та бүхний ажил үйлс Алтай таван богд уул шигээ сүндэрлэж, буян заяа тань  зүйл бүрээр дэлгэрэх болтугай.