Д.Сарангэрэл: Өрхийн эмч нарт 300 мянган төгрөг олгох боломжгүй

А.Мишээл GoGo.mn

2017-12-07 14:56 GMT+8

УИХ-аас баталсан, 2017 оны төсвийн тодотголд төрийн албан хаагчдад 300 хүртэлх мянган төгрөг, багш нарт 500 мянган төгрөгийн үр дүнгийн урамшуулал олгохоор тусгасан.

Гэвч энэ урамшууллыг өрхийн эмнэлгийн ажилчдад олгохгүй болсныг өрхийн эмч нар эсэргүүцжээ.

Тэд "Төрийн албан хаагчдад нэг удаа олгох 300 мянган төгрөгийг бидэнд өгөхгүй гэж шийдвэрлэсэн байна. Энэ шийдвэрийг хүлээн зөвшөөрөхгүй. Биднийг ялгаварлан гадуурхаж байна" гэжээ.

Эрүүл мэндийн тухай хуулийн 16.2 дугаар заалтад:

16.2.Өрхийн эрүүл мэндийн төв нь хот, суурин газрын хүн амд төрөөс үзүүлэх өрхийн эрүүл мэндийн тусламж, үйлчилгээг гэрээгээр гүйцэтгэх үндсэн чиг үүрэг бүхий сайн дурын үндсэн дээр бүртгүүлсэн хувийн хэвшлийн эрүүл мэндийн байгууллага байна.

гэж заасан байдаг.

Энэ заалтаас шалтгаалаад "Өрхийн эрүүл мэндийн төвийн эмч, сувилагч, ажилтнууд төрийн халамж, тэтгэлэг зэргээс үргэлж хоцорч байдаг.  Энэ удаад ч мөн эмнэлгийн анхан шатны үйлчилгээг үзүүлж ханиад томуу, гоц халдварт өвчлөлийн үед цаг наргүй ажиллаж, илүү цагийн цалин ч бодуулж авдаггүй.

Гэвч өрхийн эрүүл мэндийн төвүүд нь нэг иргэнээр тооцсон тарифаар улсын төсвөөс санхүүждэг. Улсын төсвөөс санхүүждэг ч хувийн хэвшил гэдэг утгаараа өрхийн эмнэлгийн ажилтнуудыг урамшууллаас гадна үлдээдэг" гэжээ. Тиймээс Эрүүл мэндийн сайд Д.Сарангэрэлд хандаж ийнхүү хэвлэлийн хурал хийсэн байна.

Харин үүний хариуд Эрүүл мэндийн сайд Д.Сарангэрэл:

ЭМЯ БҮХ ӨРХИЙН ЭМНЭЛЭГТ ТУС БҮР 8 САЯ 50 МЯНГАН ТӨГРӨГИЙН САНХҮҮЖИЛТ ОЛГОНО

"Эвлэлдэн нэгдэж эрх ашгаа хамгаалах эрх бүх хүнд бий. Гэхдээ хуулийн хүрээнд асуудлаа тавих учиртай. 2013 оноос хойш төрийн албан хаагчдын цалин огт нэмэгдээгүй байдаг. Шинээр бүрэлдсэн засгийн газар эдийн засгийн нөхцөл байдал хүнд байгаа хэдий ч эхний ээлжинд төрийн албан хаагчдынхаа орлогыг нэмэгдүүлэх шийдвэрийг элдэв шүүмжлэлийг сөрөн байж гаргасан билээ.

Өрхийн эмнэлгүүд орон нутгийн өмчид тулгуурласан нөхөрлөл юм. Тиймээс төрийн албан хаагчдын адил урамшуулал авах хуулийн боломжгүй байгаа юм.

Гэвч анхан шатны тусламж үйлчилгээг эрчимжүүлэх зорилгоор Эрүүл мэндийн яам хуулийн хүрээнд улсын хэмжээнд үйл ажиллагаа явуулж буй бүх өрхийн эмнэлэгт тус бүр 8 сая 50 мянган төгрөгийн санхүүжилт хийх шийдвэрийг Даваа гарагт гаргасан юм.

Өрхийн эрүүл мэндийн төвүүдэд төр засаг тухайн хороонд амьдарч буй иргэдийн тоогоор санхүүжилт олгож ард түмэндээ эрүүл мэндийн анхан шатны тусламж үйлчилгээг үнэ төлбөргүй үзүүлдэг.

Энэ санхүүжилтийг нэмэгдүүлсэн нь өрхийн эмнэлгийн үйл ажиллагааг дэмжих, тэнд ажиллагсдын орлогыг нэмэгдүүлэх зорилготой юм. Үйлдвэрчний эвлэлийн зарим төлөөлөл энэ шийдвэрийг өөрсдийн шахалтаар гаргуулсан мэт ойлголт олон нийтэд өгөх үйлдэл хийсэнд харамсаж байна.

Цаашид Эрүүл мэндийн яам хэн нэгний шахалтгүйгээр эмч, эмнэлгийн ажилтнуудынхаа ажил хөдөлмөрийг бодитой үнэлэх чиглэлээр тууштай ажиллана. Эхний ээлжинд эмнэлгийн байгууллагууд улсын төсөв болон үйл ажиллагааны орлогоо бие даан захиран зарцуулах боломжийг бүрдүүлээд байна. Цаашид өрхийн эмнэлгийн төвүүд өдрийн эмчилгээ хийх, гэрээр явж эмнэлгийн тусламж үйлчилгээ үзүүлэн энэхүү үйл ажиллагааныхаа зардлыг эрүүл мэндийн даатгалын сангаас авах боломжтой болгож байна.

Энэ мэтчилэн эмнэлгийн үйлчилгээ нь ард иргэддээ ойрхон, эмч ажилтнууд нь ажил хөдөлмөртэйгөө уялдсан цалин урамшуулал авах бодит нөхцөлийг бүрдүүлж ажиллана. 2018 онд өрхийн эрүүл мэндийн төвийн санхүүжилт анх удаа 10-15 сая төгрөгөөр нэмэгдлээ. Өрхийн эмнэлгүүдийн тухайд оны эцэст ажлын гэрээг дүгнэхдээ даатгалаас санхүүжих чадамжийг харгалзах зөвлөмжийг Нийслэлийн эрүүл мэндийн газарт өгөх болно.

Мөн үйл ажиллагаагаа явуулж чадахгүйд хүрсэн өрхийн эмнэлгийн эмч ажилтнуудыг улсын эмнэлэгт шилжүүлж, өөр менежментийн багийг Өрхийн эрүүл мэндийн төвд ажиллуулах зэрэг сонголтууд та бүхэнд байгааг мэдээлж байна. Цаашид эмнэлгийн анхан шатны тусламж үйлчилгээг бэхжүүлэх чиглэлд энэ мэт олон арга хэмжээг авч хэрэгжүүлнэ" гэжээ.

GoGo Facebook Хуудас
 
 
Утаанаас салахын тулд ямар арга хэмжээ авах нь хамгийн зүйтэй вэ?
Нийт 23 санал өгсөн байна.

Дээшээ