Үр хөндөлт хийлгэж байгаа эмэгтэйчүүдийн 70 хувь нь 20-30 насныхан байна

Сэтгүүлч Р.Адъяасүрэн

2018-10-11 09:56 GMT+8

Нийслэлийн мэргэжлийн хяналтын газраас хууль бус үр хөндөлтийн байдалд урьдчилан сэргийлэх хяналт шалгалт хийсэн дүнгийн талаар танилцуулж байна.

Хугацаагаар эрэмбэлж харах :
10:20 2018-10-11

Үр хөндөлт хийлгэж байгаа эмэгтэйчүүдийн 70 хувь нь 20-30 насныхан байна гэсэн судалгааны дүн байна гэдгийг НМХГ-аас мэдээллээ. Сүхбаатар дүүрэгт улсын эмнэлгийн эмч 6-12 жилийн турш улсын эмнэлгийн лиценз ашиглан хувиараа эмэгтэйчүүдийн эмнэлэг ажиллуулж байжээ. Ингэхдээ хувийн эмнэлэгтээ оношилгоо хийж, эмчилгээг улсын эмнэлэгт хийсэн, улсын эмнэлэгт үзүүлсэн үйлчлүүлэгчид хувийн эмнэлгээ зааж өгч, эмчилж байсан зөрчил гаргажээ. Одоогийн байдлаар яг ийм зөрчил гаргасан 5 эмч байгаа бөгөөд эрхийг нь түдгэлзүүлэхээр хандаад байгаа аж. 

10:18 2018-10-11

Нийслэлийн хэмжээнд үзлэг, оношилгоо хийх эрхтэй 150 эмэгтэйчүүдийн эмнэлэг байдаг бөгөөд үүний 45 хэвтэн эмчлүүлэх эрхтэй байдаг аж. Эмнэлэг, эмч тусгай зөвшөөрөлгүйгээр үйл ажиллагаа явуулбал хуулийн этгээдийг 5 сая, хувь хүнийг 500 мянган төгрөгөөр торгодог байна. Харин гар дээрээс эм худалдаалж байгаа тухайд далд хэлбэрт орсон байдаг тул цагдаагийн байгууллагатай хамтран ажиллаж байна гэдгийг НМХГ-аас мэдээллээ.

10:13 2018-10-11

Төрийн өмчийн эмнэлгийн нэр дээр тусгай зөвшөөрөл авч, хувийн эмнэлэг ажиллуулж байгаа нь ашиг сонирхлын зөрчил үүсгэж байна гэдгийг хурлын үеэр онцоллоо. Иймд тусгай зөвшөөрөл олгох, эргэх хяналтыг сайжруулах албан бичгийг Нийслэлийн эрүүл мэндийн газарт хүргүүлээд байгаа юм байна. 

Үр хөндөлт хийлгэсэн эмэгтэйчүүдийн 50 хувь нь дахин жирэмслэхдээ ямар нэг хүндрэл гардгаас гадна үргүйдлийн асуудалтай болдог тул жирэмслэлтээс урьдчилан сэргийлэхэд анхаарах шаардлагатай байгааг НМХГ-аас зөвлөж байна.

10:07 2018-10-11

Энэ оны эхний найман сарын байдлаар хууль бус үр хөндөлтийн улмаас биеийн байдал нь хүндэрч, Эх хүүхдийн эрүүл мэндийн төв болон Амгалан амаржих газар хандсан 21 тохиолдол бүртгэгдсэн байна.

Дээрх 21 тохиолдлын 14 нь гар дээрээс үр зулбуулах эм худалдан авч уусан байжээ. Тодруулбал,

  • Эрээнээс 3,
  • Интернэтээр 2,
  • Нарантуул захаас 3,
  • Зүүн хараагийн захаас 4,
  • Хувь хүнээс 2 байгаа аж.

Мөн үр хөндөлтийн улмаас хүндрэл өгч, умай цоорсон 2 тохиолдлыг мэс заслын аргаар эмчилжээ. Өөрөөр хэлбэл тухайн хоёр эмэгтэй умайгаа авахуулсан байна. 

Үр хөндөлтийг магадлан итгэмжлэгдсэн, тусгай зөвшөөрөлтэй эмнэлэг явуулах ёстой байхад Баянзүрх дүүрэгт байрлах Энхийн төлөө эмнэлэгт Н гэх эмэгтэй үр хөндөлтөд орж, хүндрэл үүсэн умайгаа авахуулсан гэдгийг мэдээллийн үеэр дурдлаа. Тиймээс тус эмнэлгийн тусгай зөвшөөрлийг цуцлуулахаар хандаад байгаа аж. 

10:05 2018-10-11

Шалгалтаар тусгай зөвшөөрөлд зааснаас өөр үйл ажиллагааг, өөр хаяг байршилд явуулж буй Энхлэг, Сүйжин, Ач арвижих, Ди Эо Өш, Энхмөнхманал эмнэлгүүдийг илрүүлсэн байна.

Зөвшөөрөлгүй эрүүл мэндийн байгууллагууд үйл ажиллагаа явуулж байснаас гадна 3 эмч зөвшөөрөлгүй үйл ажиллагааг явуулж байжээ. Зөрчлийн тухай хуулийн дагуу 4 хуулийн этгээд, 3 эмчид 2.9 сая төгрөгийн шийтгэлийг ногдуулсан байна. 

10:03 2018-10-11

Хууль бус үр хөндөлтийн тохиолдлыг илрүүлэх, тэмцэх, давтан болон аюултай үр хөндөлтөөс сэргийлэх бууруулах зорилгоор Нийслэлд үйл ажиллагаа явуулж буй эх барих, эмэгтэйчүүдийн өвчний оношилгоо, эмчилгээний чиглэлээр ажилладаг хувийн хэвшлийн 46 эмнэлэгт хяналт, шалгалт хийжээ.

10:01 2018-10-11

09:57 2018-10-11

Нийслэлийн мэргэжлийн хяналтын газраас хууль бус үр хөндөлтийн байдалд урьдчилан сэргийлэх хяналт шалгалт хийсэн дүнгийн талаар танилцуулж байна.

GoGo Facebook Хуудас
 
 
Хотын дарга Су.Батболдын ажлыг Та хэрхэн дүгнэх вэ?
Нийт 1904 санал өгсөн байна.

Дээшээ