УИХ-ын гишүүн Б.Батзоригийн бүрэн эрхийг түдгэлзүүлэх ШААРДЛАГАГҮЙ гэж үзлээ

Сэтгүүлч Р.Адъяасүрэн

2018-11-07 11:07 GMT+8

УИХ-ын чуулганы ээлжит бус хуралдаанаар Б.Батзоригийн гишүүний бүрэн эрхийг түдгэлзүүлэх эсэх асуудлыг хэлэлцэж байна.

Хугацаагаар эрэмбэлж харах :
11:06 2018-11-07

Б.Батзоригийн гишүүний бүрэн эрхийг түдгэлзүүлэх эсэхийг нууц санал хураалтыг цахим тоолуураар явуулахаар боллоо.

Нууц санал хураалтад 86.8 хувийн саналаар түдгэлзүүлэх шаардлагагүй гэж үзлээ. 

10:51 2018-11-07

УИХ-ын гишүүн Ц.Нямдорж: УИХ-ыг тараах асуудал бүтэн жил явсан. Тараана гэж индэр дээрээс илтгэл тавьсан. Дараа нь телевизийн ярилцлагад орсон. Түүний дараа долоо хоногт энэ асуудал орж ирсэн. Засаглалын хэлбэр солих ажлыг ийм замаар хийж болохгүй. Ерөнхийлөгч, Ерөнхий сайд энэ асуудалд сэтгэлийн хөөрлөөр хандаж болохгүй. 

10:46 2018-11-07

УИХ-ын гишүүн Л.Болд: Энэ асуудалд холбогдсон гишүүд намаасаа биш ард түмнээсээ уучлалт гуй. Аргагүйн эрхэнд прокурор үгээ хэлж байна. Та нарт асуудал байна гэж хэлж байна шүү дээ. Ц.Даваасүрэн гишүүн та асуудлыг өөр тийш нь хандуулах бохир арга битгий хэрэглээд бай. Ганц хэлж байгаа хүнээ битгий дайрч, давшлаад бай. 

УИХ-ын гишүүн Ө.Энхтүвшин: Бүр үг хэлмээр санагдчихлаа. Зааланд ярьж байгаа юмнуудыг сонсоод бүр толгой эргэчихлээ. Та нарын баталсан хууль чинь ийм шүү дээ гэж прокурор хэлж байна. Гэтэл прокурорт бүх эрх мэдэл байна гэж байна. Тэгсэн Хууль зүйн байнгын хороонд гацаад байна гэж байна. Нэг нэг рүүгээ чихээд байх юм. Гишүүдийн урьдын том хэргүүдийг гацааж байгаа чинь үнэн шүү дээ, прокурор оо. 60 тэрбум, АСЕМ, том гэрээнүүд гээд олон жил гацлаа шүү дээ. Эдгээр асуудлаа танилцуул л даа. 

Тэгж ярьвал 2015 онд УИХ-ын 25 гишүүн гарын үсэг зураад шалгуулъя гэсэн хэрэг ч бий. Одоо хүртэл хариу алга. Ямар асуудалд нь ингэж хурдан ажиллаад, ямарт нь ингэж удаад байгаа юм бэ. 

ЖДҮ-ийн зээлтэй холбоотой асуудалд 50 хүн холбогдсон гээд байна. Ямар ямар хүн холбоотой байгаа юм, тэрийг бүгдийг нь зарлах хэрэгтэй байна. Үнэн бол гишүүдийн гуравны хоёр нь холбогдсон ийм асуудал үнэхээр байвал тарах хэрэгтэй. Сэтгүүлчдэд хуулийн байгууллагаас энэ мэдээллийг өгсөн гэж би бодож байна. Түүнээс сэтгүүлчид мэдэх үндэсгүй. 

10:23 2018-11-07

УИХ-ын гишүүн О.Баасанхүү: УЕП-оос оруулж ирсэн саналыг дэмжиж буйгаа илэрхийллээ. Нам нь дарамтлаад байгаа болохоор гишүүд нь намын санхүүжилт олж өгөх гээд яваад байх шиг байна. ЖДҮ-ийн зээлийн асуудлаар би тууштай явах болно. 

Нам нь нам шиг байх хэрэгтэй. 65-ын бүлэг нь 64 болсон одоо 63 цаашлаад 62 гээд явах юм шиг байна. 

10:21 2018-11-07

Улсын Ерөнхий Прокурор М.Энх-Амгалан хууль хяналтын байгууллага ажиллаж чадахгүй байна гэж хэлэхийн оронд чуулганы танхимдаа шударга ёсоо тогтоож, хууль журмаа зөв тогтоон ажиллах хэрэгтэй гээд "Та нар ямар шийдвэр гаргахыг би мэдэхгүй байна. Гэхдээ шударга ёс ярьж байгаа бол та нар өөрсдөөсөө эхэл. Бид шударга ёс тогтоох гэж Б.Батзориг гишүүний бүрэн эрхийг түдгэлзүүлэх асуудал оруулж ирж байна. Хуулиа та нар баталж гаргасан. Тэгээд та нар барьж хорьсонгүй гээд хууль хэрэгжүүлж байгаа хүн рүү ярих хэрэггүй шүү. Асуудлаа ялгаж салгаж хар. Шударга ёс гэдэг чинь энэ танхимаас эхлэх ёстой юм. Хаана байна тэр шударга ёс чинь" гэв. 

Харин УИХ-ын гишүүн М.Оюунчимэг түүнийг чуулганы танхимд орж ирээд гишүүдийг загнахаар эрх мэдэлтэй юм байна, загнаж зандрахын оронд хамтдаа хэрхэн ажиллаж болохыг хэлнэ үү гэв. 

Үүний хариуд М.Энх-Амгалан "Гишүүн буруу ойлгосон юм шиг байна. Би юу гэж энэ танхимд орж ирээд хүн загнах вэ. Угийн чанга ярьдаг болохоор танд тэгж санагдсан бол уучлаарай" хэмээв. 

10:03 2018-11-07

УИХ-ын гишүүн Л.Болд: УИХ-ын бүлгүүд намын даалгаваргүй ажилламаар байна. Эрх мэдэл, албан тушаалаа урвуулан ашиглах гэмт хэрэг үйлдсэн нь тогтоогдсон гэсэн байгаа учраас энэ хүн одоо шүүх рүү явах юм уу. Яллагдагчаар татсан гэж прокурорын албан бичигт дурдсан байна. Намайг үг хэллээ гээд олонхиороо барьж идэж болно. Намайг энд баалах, дэвслэх яах вэ, ард түмнээ тайвшруулаач. 

Улсын Ерөнхий прокурор: Гишүүний ёс зүйн асуудлыг хаа нэг газарт тавих эрх хэмжээ Улсын Ерөнхий прокурорт байхгүй. Би зөвхөн эрүүгийн хэрэгт яллагдагчаар татах эрх бүхий хүн. Ёсзүйн хороонд бичиг өгсөн зүйлгүй. 

УИХ-ын гишүүн Ц.Оюунхорол: Монголын улс төрд бий болсон нөхцөл байдал ээдрээтэй цаг үед бид хуралдаж байна. Монголын төрд ард түмэн итгэхгүй байна. Зарим нэг гишүүн үүссэн асуудлыг улс төртэй холбож байгаад харамсаж байна. Л.Болд гишүүнд харамсаж байна. Та УИХ-ын чуулганы танхимаас иргэдийг уриалсан, турхирсан зүйлийг байнга ярьж, улс төрийн оноо авах гэж байна. Таниас төрийнхөө сүлдэнд залбирч амьдардаг ард түмнийг тайван байлгахыг хүсч байна. Монголын парламент харьцангуй тайван, эрүүл ажилладаг гэж боддог.

09:49 2018-11-07

УИХ-ын гишүүн О.Баасанхүү: Өчигдөр 22.00 цаг болж байхад байнгын хорооны хуралдаантай гүйгээрэй гэж над руу ярьсан. Та нар бүлэг дээрээ хэлэлцсэн асуудлаа байнгын хорооны хуралдаан гэж яриад байх юм. Ерөнхий прокурор хэвлэлд өгсөн тодруулгадаа УИХ-ын дөрвөн гишүүн мөнгө угаах хэрэгт холбогдсон байна гэсэн байна. Тэр хүмүүсээ зарла. Өдөрт нэг хүний эрхийг түдгэлзүүлэх эсэх талаар хуралдах юм уу. 

Б.Батзориг намын даалгавраар сайдын албан тушаалаа өгсөн тул одоо гишүүнээр авч үлдэхээр ярьж байгаа юм байна гэж ойлгож байна. 2020 оны сонгуулийн мөнгөө босгохын тулд ард түмний мөнгийг авч угаах үүрэг даалгавар өгсөн хүнийг нь шалгах юм уу. 

Одоо бид хамаарал бүхий компанидаа өгсөн гэж яриад байна. Гэтэл бодитоороо огт хамааралгүй компаниар дамжуулаад ашиг аваад, ХОМ-ыг маань шалга гээд суугаад байгаа хүмүүс байна. Энэ асуудлыг хэзээ шалгаж дуусах юм бэ?

 

09:43 2018-11-07

Эрүүгийн хуульд зааснаар улс төрд нөлөө бүхий Засгийн газрын гишүүн албан тушаалаа урвуулан ашиглах гэмт хэрэг үйлдсэн гэж үзэх үндэслэлтэй учраас Нийслэлийн прокуророос хяналт тавин ажиллаж байгаа аж. 

УИХ-ын гишүүн Ц.Нямдорж мэдээлэл хийлээ. "Халдашгүй байдлын дэд хороо бүрэн бүрэлдэхүүнээрээ хуралдсан. Б.Батзориг гишүүний бүрэн эрхийг түдгэлзүүлэх асуудлыг хэлэлцэж, одоогийн түвшинд бүрэн эрхийг түдгэлзүүлэх асуудлыг хүлээн авах боломжгүй гэж үзлээ" гэв.

Сүүлийн нэг жилийн хугацаанд ЖДҮ-ийн зээлтэй холбоотой асуудлыг шалгаж байгаа гэдгийг ч тэрбээр хэллээ. 

Хууль зүйн байнгын хорооны дарга Ш.Раднаасэд мөн байнгын хороо өчигдөр энэ асуудлаар хуралдан гишүүний бүрэн эрхийг түдгэлзүүлэх шаардлагагүй гэж үзсэн талаараа танилцууллаа. 

09:37 2018-11-07

УИХ-ын гишүүн Л.Болд энэ асуудлаар үг хэллээ. Тэрээр хуулийн асуудалд нам төрийн шийдвэрийг оролцуулж байгаа нь гутамшиг гэдгийг хэлж байна. Учир нь Ерөнхий сайд өчигдрийн чуулганы үеэр зээлтэй нэр холбогдсон гишүүд зээлээ төлөхгүй, уучлалт гуйхгүй бол дараагийн сонгуульд нэр дэвшүүлэхгүй гэсэн байж боломгүй зүйл хэлсэн гэдгийг тэрбээр хэлж байна.

Б.Батзоригийн гишүүний бүрэн эрхийг түдгэлзүүлэх эсэх асуудлыг өчигдөр бүлгийн болон байнгын хороодын хурлаар намын шийдвэрээр зуун хувь авч үлдэхээр шийдсэн нь байж болохгүй гэдгийг тэрбээр хэллээ. 

09:34 2018-11-07

Монгол Улсын ерөнхий прокуророос ирүүлсэн саналд, Улсын Их Хурлын гишүүн Б.Батзориг нь “Засгийн газрын гишүүн, Хүнс, хөдөө, аж ахуйн сайдаар ажиллахдаа Жижиг дунд үйлдвэрийг хөгжүүлэх сангаас зээлийн санхүүжилт олгох шийдвэр гаргахдаа албаны бүрэн эрх, албан тушаалын байдлаа урвуулан ашиглаж бусдад давуу байдал бий болгосон” гэх эрүүгийн хэрэгт Авлигатай тэмцэх газар мөрдөн шалгах ажиллагаа явуулж, Нийслэлийн прокурорын газраас хяналт тавин ажиллаж байна.

Мөрдөн шалгах ажиллагааны явцад цугларсан нотлох баримтуудаар Улсын Их Хурлын гишүүн Б.Батзориг нь Монгол Улсын Эрүүгийн хуулийн тусгай ангийн 22.1 дүгээр зүйлийн 3 дахь хэсэгт заасан улс төрд нөлөө бүхий этгээд болох Засгийн газрын гишүүний эрх мэдэл, албан тушаалаа урвуулан ашиглах гэмт хэргийг үйлдсэн гэж үзэх нөхцөл байдал тогтоогдсон тул мөрдөгчийн эрүүгийн хэрэг үүсгэж яллагдагчаар татах саналыг прокурор хянаад үндэслэлтэй гэж үзэж 2018 оны 11 дүгээр сарын 5-ны өдөр эрүүгийн хэрэг үүсгэж яллагдагчаар татах тогтоол үйлдсэн тухай дурджээ.

09:32 2018-11-07

УИХ-ын чуулганы ээлжит бус хуралдаанаар Б.Батзоригийн гишүүний бүрэн эрхийг түдгэлзүүлэх эсэх асуудлыг хэлэлцэж байна.

МАН-ын бүлэг болон байнгын хороодын хуралдаанаар түүний бүрэн эрхийг түдгэлзүүлэх шаардлагагүй гэж үзсэн юм. 

GoGo Facebook Хуудас
 
 
УИХ-ын гишүүн Д.Хаянхярваагийн санаачилгаар нэр бүхий 27 гишүүн У.Хүрэлсүхийн Засгийн газрыг огцруулах шаардлагатай гэж үзэн, тогтоолын төсөл өргөн барилаа. Таны бодлоор Засгийн газрыг огцруулах нь зөв үү?
Нийт 3319 санал өгсөн байна.

Дээшээ