Аймаг, дүүргийн эмнэлгүүдэд ургийн болон хэвлийн оношилгооны орчин үеийн аппаратууд хүлээлгэн өглөө

Энэ мэдээг шинэ хувилбараар унших бол арын товч дээр дарна уу
Сэтгүүлч Э.Оргил GoGo.mn

2019-03-13 10:50 GMT+8

Эрүүл мэндийн яамнаас хэрэгжүүлж буй Япон улсын хамтын ажиллагааны хөтөлбөрийн хүрээнд өчигдөр нийслэл болон орон нутгийн эмнэлгүүдэд нэн шаардлагатай тоног төхөөрөмжийг хүлээлгэж өглөө. Энэ арга хэмжээнд Эрүүл мэндийн сайд Д.Сарангэрэл, Япон улсаас Монгол Улсад суугаа Онц бөгөөд Бүрэн Эрхт Элчин сайд Масато Такаока, ЭМЯ-ны Төрийн нарийн бичгийн дарга Б.Бямбадорж, Нийслэлийн Эрүүл мэндийн газрын дарга Л.Төмөрбаатар болон албаны бусад хүмүүс оролцсон юм.

Япон улсын “HITACHI” фирмийн “HI VISION Avius” загварын өндөр хүчин чадал бүхий нийт 34 ширхэг хэт авиан /ЭХО/ оношилгооны аппаратыг 21 аймгийн нэгдсэн эмнэлэг, бүсийн оношилгоо эмчилгээний төв, нийслэлийн есөн дүүргийн эрүүл мэндийн төв, Улсын нэгдүгээр төв эмнэлэг, Улсын гуравдугаар төв эмнэлэг, Хавдар судлалын үндэсний төв, Халдварт өвчин судлалын үндэсний төвд хүлээлгэн өгч байна.

Уг аппарат нь эх барих, эмэгтэйчүүд, ургийн болон хэвлий, зүрх судасны оношилгоо, эмчилгээнд ашиглах бүрэн боломжтой, олон төрлийн үзүүлэлт бүхий орчин үеийн дэвшилтэт технологи юм. Ялангуяа элэгний хорт хавдрыг эрт илрүүлэх, оношилгоо эмчилгээнд ашиглах өндөр хүчин чадалтай бөгөөд “Элэг бүтэн Монгол” үндэсний хөтөлбөрийг хэрэгжүүлэх ажилд чухал ач холбогдолтой оношилгооны аппарат юм байна.

Мөн уг төслийн хүрээнд Улсын нэгдүгээр төв эмнэлэгт нэг тэрбум төгрөгийн үнэтэй рентгэн аппаратыг хүлээлгэж өгсөн бөгөөд энэ нь Япон улсын “SHIMADZU” корпорацийн “OPESCOPE ACTENO” загварын, мэдрэл болон судасны мэс засал, бөөр шилжүүлэн суулгах мэс засалд ашиглах зориулалт бүхий дижитал технологид суурилсан аппарат ажээ.

Эх сурвалж: НЭМГ 

GoGo Facebook Хуудас
 
 

Дээшээ