АНУ, БНХАУ ирэх сарын эхээр худалдааны хэлэлцээрт хүрэхээр зорьж байна

Энэ мэдээг шинэ хувилбараар унших бол арын товч дээр дарна уу
BloombergTV.mn

2019-04-19 13:35 GMT+8

АНУ болон БНХАУ ирэх тавдугаар сарын эхэн гэхэд худалдааны хэлэлцээрт хүрэхийг зорьж байна. Улмаар АНУ-ын Ерөнхийлөгч Дональд Трамп, БНХАУ-ын Ерөнхийлөгч Ши Жиньпин нар тавдугаар сарын эцсээр хэлэлцээрээ баталгаажуулж, гарын үсэг зурах уулзалт хийнэ гэж эх сурвалж мэдээллээ. 

АНУ-ын Худалдааны төлөөлөгч Роберт Лайтхайзер, Сангийн сайд Стивен Мнучин нар энэ сарын сүүлийн долоо хоногт Бээжинд ажиллахаар төлөвлөсөн байна. Үүний дараа БНХАУ-ын Шадар сайд Лю Хэ Вашингтонд очиж хэлэлцээгээ үргэлжлүүлнэ. Энэ үеэр ямар хэлэлцээрт хүрсэн, гарын үсэг зурах уулзалт хэзээ болох талаар олон нийтэд зарлана гэж эх сурвалж онцолжээ. Дональд Трамп энэ сарын эхээр хэлэлцээрийн төслийг нэгтгэхэд дөрвөн долоо хоног, нарийн нөхцөлүүдээр зөвшилцөлд хүрэхэд дахиад хоёр долоо хоног хэрэгтэй гэж мэдэгдэж байсан юм.

Харин лхагва гарагт Цагаан ордонд хийсэн мэдэгдлийнхээ үеэр “Хэлэлцээ амжилттай болно гэдэгт итгэлтэй байгаа төдийгүй ойрын хугацаанд тодорхой мэдээлэл өгнө” гэж онцолжээ. Үүнээс өмнө АНУ-ын Сангийн сайд Стивен Мнучин БНХАУ-тай худалдааны асуудлаарх хэлэлцээ эцсийн шатанд ороход ойртсон гэж мэдэгдсэн аж. Дэлхийд тэргүүлэгч эдийн засагтай хоёр улсын дунд есөн сар үргэлжилж буй “Худалдааны дайн”-ыг эцэслэх хэлэлцээ үргэлжилсээр байна. “Худалдааны дайн” зах зээлд сөргөөр нөлөөлөөд зогсохгүй дэлхийн эдийн засгийн өсөлтөд эрсдэл дагуулж байгаа юм.

Түүнчлэн "АНУ, БНХАУ-ын итгэлцэл доод түвшинд хүрч буурсан" гэж Бээжин дэх АНУ-ын Худалдааны танхимаас мэдэгдлээ. Тус байгууллагаас жил тутамд гаргадаг хоёр талын худалдааны харилцааны тайланд онцолсноор зөрчилдөөнөөс үүдэн буурцаг, эмнэлгийн тоног төхөөрөмж зэрэг бараа, бүтээгдэхүүний эргэлт буурч, хоёр улсын экспорт аль аль нь агшсан, санхүүгийн зах зээлд сөргөөр нөлөөлсөн үзүүлэлттэй байна.

Н.Номин-Эрдэнэ | @Nominerdene_NDN

GoGo Facebook Хуудас
 
 
Ерөнхийлөгчийн санаачилсан Монгол Улсын Үндсэн хуульд оруулах нэмэлт, өөрчлөлтийн төслийн УИХ-ын гишүүдийн тоог 108 болгож, бүрэн эрхийн хугацааг таван жил болгох заалтыг та дэмжиж байна уу.
Нийт 795 санал өгсөн байна.

Дээшээ