Д.Эрдэнэбат: Прокуророос гаргасан яллагдагчаар татах тогтоолд би гарын үсэг зурсан

Энэ мэдээг шинэ хувилбараар унших бол арын товч дээр дарна уу
Сэтгүүлч Э.Оргил GoGo.mn

2019-05-23 11:03 GMT+8

УИХ дахь АН-ын зөвлөлийн дарга Д.Эрдэнэбатыг Эрдэнэт үйлдвэрийн 49 хувьтай холбоотой асуудлаар мэдээлэл хийж байна.

Хугацаагаар эрэмбэлж харах :
11:02 2019-05-23

10:28 2019-05-23

УИХ дахь АН-ын зөвлөлийн дарга Д.Эрдэнэбатыг Эрдэнэт үйлдвэрийн 49 хувьтай холбоотой асуудлаар мэдээлэл хийж байна. Түүнийг Эрдэнэтийн 49 хувийг Монголын ААН нэгж авахад нөлөө үзүүлсэн гэж АТГ шалгаж байгаа юм. 

Тэрбээр, Тавдугаар сарын 21-ний үдээс хойш намайг дуудаж, Эрдэнэт үйлдвэрийн 49 хувьтай холбоотой асуудлаар яллагдагчаар татах Прокурорын тогтоолыг танилцуулсан. Үүнээс долоо хоногийн өмнө гэрчийн мэдүүлэг авч, маш шуурхай яллагдагчаар татах тогтоол гарсан байна. 

Би энэ асуудлыг хуулийн дагуу ямар ч улс төргүйгээр шалгуулъя гэж байтал асуудлыг улс төржүүлж байгаа нь өчигдөр Сангийн сайд Ч.Хүрэлбаатар Эрдэнэтийн 49 хувьтай холбоотой асуудлаар, ЗГХЭГ-ын дарга Л.Оюун-Эрдэнэ Хөгжлийн банктай холбоотой асуудлаар хийсэн  мэдэгдлээс харагдаж байна. Тиймээс би өнөөдөр АТГ, Ерөнхий прокурорт хүсэлт хүргүүлж байна.

Эрүүгийн хэрэг хянан шийдвэрлэх тухай хуульд хэрэг бүртгэх, мөрдөн байцаалттай холбоотой асуудлыг Прокурорын зөвшөөрсөн хэмжээнд мэдээлнэ гэсэн зохицуулалт байдаг ч хууль зөрчин мөрдөн байцаалттай холбоотой асуудлаар мэдээлэл хийж байгааг анхааралдаа авна уу гэж хүсэлт хүргүүлнэ. 

ОХУ-ын компанийн өмчлөлд байсан Эрдэнэтийн 49 хувийг Монгол Улсын Засгийн газар хамтын улс төрийн шийдвэр гаргаж Монголдоо оруулж ирснийг би зөв гэж үзэж байгаа. Энэ асуудлаар АТГ-аас надад мөрдөн байцаалт явуулж байна, учир нь олдох байх аа. 

Эрдэнэтийн 49 хувийг Монголын ААН авснаар Монголд ямар ч хохирол авчраагүй. Ямар ч хохирол авчраагүй байхад Монголд Улсад онц ноцтой хохирол учруулсан гэх үндэслэл гаргасныг би буруу гэж харж байна. 

Аж үйлдвэрийн сайд байсны хувьд энэ асуудлыг би ЗГ-ын хуралдаанд оруулан хэлэлцүүлэх үүрэг хүлээсэн. Засгийн газар хамтын улс төрийн шийдвэр гаргасан. Эрдэнэт үйлдвэр 100 хувь Монголын өмч болж байгаа нь миний итгэл үнэмшил байсан, одоо энэ байр сууриа баримталсаар байгаа. 

Эрдэнэбат гэдэг ганц хүний асуудлыг яаж шийдэх эрх нь төрд байгаа. Надад өөрийгөө хамгаалах, хаацайлах болон айдас алга. Ганцхан өнөөдөр 3 сая хүний аж амьдрал, нөхцөл байдал туйлийн хүндэрч байхад ингэж харлуулсан улс төрөөс улс орон урагш явахгүй шүү гэдгийг эрх баригчдад сануулмаар байна.  

Өнөөдрийн энэ үйл явц 2020 оны сонгуульд чиглэсэн ажил эхэлж байна гэж харж байна. Улс төрийг улс төрөөр хариулахаас өөр аргагүй. 

Надад яллагдагчаар татах тогтоол танилцуулсан, Та гарын үсгээ зурна уу гэсэн. Энэ асуудлыг шийдвэрлүүлэхийн тулд би тогтоолтой танилцаад газрын үсэг зурсан. УИХ-ын гишүүний бүрэн эрхийг түдгэлзүүлэх эсэх асуудал одоогоор яригдаагүй. 

GoGo Facebook Хуудас
 
 

Дээшээ