ОХУ-д 2500 хүн жагсаж эрэн сурвалжлах сэтгүүлч Иван Голуновыг суллуулжээ

Энэ мэдээг шинэ хувилбараар унших бол арын товч дээр дарна уу
Э.Онон GoGo.mn

2019-06-13 16:35 GMT+8

ОХУ-д баривчлагдаад байсан эрэн сурвалжлах сэтгүүл зүйн бүтээл туурвидаг Иван Голуновыг мягмар гарагт суллажээ. 36 настай чөлөөт сэтгүүлч Иван Голунов нь Латвид төвтэй “Meduza” вэбсайтад ажилладаг байна. Тэрээр ОХУ-ын өндөр албан тушаалтнуудын авлигын хэргийг илрүүлж, олонд танигджээ.

ОХУ-ын цагдаагийн газраас түүнийг хар тамхитай холбоотой хэргээр өнгөрсөн долоо хоногт баривчилсан ч ард иргэд үүнийг эрс няцааж байв. Энэхүү хэрэгтэй холбоотой олон нийтийн тэмцлийг орон даяар өрнүүлсний эцэст сэтгүүлчийг суллах шийдвэр гаргажээ.

Орон нутгийн хэвлэлийн мэдээлснээр уг жагсаалд 2500 гаруй хүн оролцсон байна. Тэмцлийн үеэр 400 орчим хүнийг баривчилсан аж.

ОХУ-ын дотоод хэргийн сайд Владимир Колокоцев “Голуновын эсрэг өдүүлсэн хэргийн нотлох баримт хангалтгүй байна. Бид хүн бүрийн эрхийг хамгаалах хэрэгтэй” хэмээжээ.

Хэвлэл мэдээллийн эрх чөлөөт байдлаараа Орос 100 орноос 83-т жагсдаг байна. Тус улсад эрэн сурвалжлах сэтгүүлчдийн амыг таглахын тулд хар тамхины хэрэгтэй хамаатуулдаг тухай нийгмийн зүтгэлтнүүд хэлж байв.

Суллагдсаныхаа дараа Иван Голунов эрэн сурвалжлах бүтээлээ үргэлжлүүлэн хийнэ гэдгээ олон нийтэд амласан юм.

Эх сурвалж: BBC

GoGo Facebook Хуудас
 
 

Дээшээ