ХБНГУ-аас Монгол Улсад суух Элчин сайд Ёорн Розенберг Итгэмжлэх жуух бичгээ өргөн барилаа

Энэ мэдээг шинэ хувилбараар унших бол арын товч дээр дарна уу
Сэтгүүлч Э.Оргил GoGo.mn

2019-08-10 15:30 GMT+8

Холбооны Бүгд Найрамдах Герман улсаас Монгол Улсад суух Онц бөгөөд Бүрэн эрхт Элчин сайдаар томилогдон ирсэн Ёорн Розенберг өнөөдөр Монгол Улсын Ерөнхийлөгч Х.Баттулгад Итгэмжлэх жуух бичгээ өргөн барилаа.

Ноён Ёорн Розенбергийг Итгэмжлэх жуух бичгээ өргөн барьсантай нь холбогдуулан Монгол Улсын Ерөнхийлөгч Х.Баттулга хүлээн авч уулзаад, Монгол Улсад 1990-ээд онд өрнөсөн ардчилал, зах зээлийн өөрчлөлт, шинэчлэлийг ХБНГУ-ын Засгийн газар анхнаас нь тууштай дэмжиж ирсэнд талархаж явдгаа илэрхийлсэн юм.

Мөн хөгжлийн бодлогын хамтын ажиллагааны хүрээнд Германы талаас хөнгөлөлттэй зээл, тусламж үзүүлж байсан гэдгийг дурдаад, эдүгээ Монгол Улс үр ашигтай эдийн засгийн харилцааг эрхэмлэж, нэмүү өртөг шингээсэн эцсийн бүтээгдэхүүн үйлдвэрлэх, экспортлоход тэргүүлэх ач холбогдол өгч буй гэдгээ хэллээ.
Малын гаралтай түүхий эд, ноолуурыг нано болон биотехнологиор боловсруулан эцсийн бүтээгдэхүүн үйлдвэрлэх чиглэлээр хамтран ажиллах хөдөө аж ахуйн боломж байгаагийн дээр дагуул хот бий болгох, эко хот байгуулах чиглэлээр өмнө нь ярьсан яриа хэлэлцээрийг ажил хэрэг болгоход Элчин сайдыг анхаарч ажиллахыг хүсэв.

Ноён Ёорн Розенберг Монгол Улсад суух Элчин сайдаар томилогдох хүсэлтээ өөрөө гаргасан гэдгээ тодотгоод дипломатын албанд 30 жил ажиллахдаа үргэлж эдийн засгийн харилцааг өргөжүүлэх тал дээр анхаарч байсан тул Төрийн тэргүүний онцолсон салбар, төсөл хөтөлбөрүүдтэй биечлэн танилцаж анхаарал хандуулахаа илэрхийлсэн юм.
Мөн энэ сард болох Герман улсаас бусад улсад суух Элчин сайд, олон улсын байгууллагын төлөөлөгчдийн хуралд оролцох үеэрээ улсынхаа Канцлертай уулзаж, Герман улсын архитектор, мэргэжилтнүүдийн боловсруулсан төслөөр Улаанбаатар хотын ойролцоо дагуул, эко хот байгуулах төслийг эргэн сануулж, Монгол Улсын Ерөнхийлөгчийн дэвшүүлсэн санал, санаачилгуудыг дамжуулахаа илэрхийлэв.


Эх сурвалж: Ерөнхийлөгчийн хэвлэл мэдээллийн алба 

GoGo Facebook Хуудас
 
 
УИХ дахь МАН-ын бүлгийн гишүүд УИХ-ын гишүүдийн тоог 99 болгон нэмье гэж санал нэгдэв. Харин АН-ын зөвлөл болон Ерөнхийлөгч 108 байх ёстой гэсэн юм. Таны бодлоор УИХ-ын гишүүдийн тоо хэд байх нь зөв бэ?
Нийт 450 санал өгсөн байна.

Дээшээ