Ерөнхий боловсролын сургуулийн сурагчдад телевиз, интернэтээр 74 цагийн хичээл заана

GoGo.mn

2009-11-04 14:33 GMT+8

Орон даяар 14 хоногийн  өндөржүүлсэн бэлэн байдалд шилжин ажиллах шийдвэрийг өчигдөр гарган, өнөөдрийн Засгийн газрын хуралдаанаар батлаад байна.

Үүний дагуу ерөнхий боловсролын сурагчдын амралтыг 14 хоногоор сунган энэ сарын 17-нийг хүртэл хойшлуулаад байгаа билээ.

Харин оюутнуудын хичээл хэвийн үргэлжлэх юм байна. Боловсрол, соёл, шинжлэх ухааны яамнаас ажлын хэсэг гаран их, дээд сургуулийн ариун цэвэр, халдваргүйжилтийг тодорхой цагуудад шалгалт хийж, хэвийн байдлыг хангаж ажиллуулах аж.

Цэцэрлэгийн хүмүүжигч нарын хувьд тухайн орон нутаг, засаг захиргаа болон Улсын Онцгой комисс зөвшилцөж байж үйл ажиллагааг нь хэзээ эхлүүлэхийг шийдэх гэнэ.

Сурагчдын хичээлийг телевизээр заана гэсэнтэй холбогдуулан Боловсрол, соёл, шинжлэх ухааны яамны холбогдох хүмүүсээс тодруулга авахад “нийт 74 цагийн хичээлийг телевиз болон онлайнаар сурагчдад заах болно. Ингэхдээ орон даяар үйл ажиллагаа явуулж буй бүх телевизтэй хамтарч ажиллана” гэлээ.

БСШУ-ны сайдын тушаалаар өнөөдөр ЕБС-ийн сурагчдад зориулан 74 цагийн хичээлийн хуваарийг баталсан байна. Тэд телевизээр улсын хэмжээнд хамгийн сайн гэгдэх багш нараар хичээлийг заалгаж сурагчидтай багш нар утсаар ярих, онлайнаар харьцах зэрэг эргэх холбоог үүсгэх гэнэ.

Мөн өндөржүүлсэн бэлэн байдалтай холбогдуулан сурагчдын улирлын амралтыг сунгаснаар хавар хичээлийн хуваарь сунгагдахгүй байх арга хэмжээг БСШУЯ авч ажиллаж байгаа талаар мэргэжилтнүүд нь ярьж байна.

Энэ баасан гаригт БСШУЯ бүх хэвлэл, мэдээллийн хэрэгслээр сурагчдад заах хичээлийн телевизийн хөтөлбөрийг бүхий л хэвлэл мэдээллийн хэрэгслээр нийтэд мэдээлэх аж.
Үндэсний портал GoGo.mn ч та бүхэндээ энэ тухай дэлгэрэнгүй мэдээлэх болно.

Ч.Болортуяа /bolortuya.ch@gogo.mn/

GoGo Facebook Хуудас

ХОЛБООТОЙ МЭДЭЭ

 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2389 санал өгсөн байна.

Дээшээ