Оюутны байрны 70 хувь нь мэргэжлийн байгууллагаар ариутгал халдваргүйтгэл хийлгээгүй байна

GoGo.mn

2009-11-11 14:38 GMT+8

-Их, дээд сургууль, коллежийн оюутны дотуур байранд хийсэн шалгалтын дүн-    

Өндөржүүлсэн бэлэн байдлын зэрэгт шилжүүлэх тухай Монгол Улсын Засгийн газрын тогтоол гарсантай холбогдуулан оюутны дотуур байр, оюутны эмнэлгүүдэд Томуугийн А хүрээний вирүсийн халдварын эрсдэлийг бууруулах, халдвартай тэмцэх арга хэмжээний талаар авч хэрэгжүүлж буй ажилд  УМХГ-аас ажлын хэсэг гарган  шалгалт хийжээ.  

Сургуулиудад байгуулагдаад буй эмнэлгүүдэд ЭМШУИС-ийн 7 эмч багш, сувилахуйн сургуулийн 2 эмч багш, резидент эмч 50 ажиллахаар томилогдсон ба шаардлагатай багаж, техник, эм тариагаар хангаад байгаа аж. Эмнэлгүүд өглөөний 9.00-20.00 хүртэл ажиллаж байгаа ба өдөрт үзүүлж байгаа оюутны тоо нэмэгдэж байгаа гэнэ.

H1N1 вирүсийн халдвараар өвчилж хүндэрсэн тохиолдолд  оюутнуудыг Төрийн тусгай албан хаагчдын нэгдсэн эмнэлэгт хэвтүүлэн эмчлэх шийдвэр гарсан байгаа.  Мөн ЭМШУИС-ийн Нийгмийн эрүүл мэндийн сургуулийн 20 багш, 80 оюутны бүрэлдэхүүнтэй тандалт судалгааны багийг ажиллуулж, оюутнуудаас судалгаа авч эхэлсэн байна.

Энэ сарын 5-наас 9-ны байдлаар нийт 203  оюутан үзүүлснээс 101 нь томуугаар өвчилсөн байна. Үүнд жирэмсэн оюутан 2 байжээ. Томуугийн эзлэх хувь үзлэгт хамрагдсан нийт оюутны 49,7%-тай байна. Томуугийн өвчлөл харьцангуй хүндрэл багатай байсан гэж мэргэжилтнүүд ярьж байгаа юм.

H1N1 болон томуугаас сэргийлэх талаар ЭМЯ, ДЭМБ-аас боловсруулсан 2 төрлийн санамжийг тус бүр 4500 хувь олшруулан оюутны 21 байрны нийт 1678 тасгуудад тараасан бөгөөд уг өвчнөөс сэргийлэх талаар сурталчилгааг хийж, оюутан, багш нарын дунд тандалт судалгааны арга зүй, сэргийлэлтийн талаар мэдээлэл хийх арга зүйн сургалтыг 3 удаа хийж, тандалт судалгаанд НЭМС-ийн судлаачийн 3, 4, 5 дугаар дамжааны нийт 65 оюутан оролцож байгаа гэнэ.

УМХГ-ын газрын хийсэн шалгалтаар илэрсэн нийтлэг зөрчилд:
-Бүх оюутны байрыг оюутны  эмнэлэгт хамруулах нэгдсэн хуваарь байхгүйгээс МСҮТ,  төвлөрсөн бус байдаг оюутны байрууд  хамаарагдаж чадаагүй;
-Соёлын дээд сургуулийн оюутны дотуур байр нь халдварт өвчнөөс урьдчилан сэргийлэх талаар тодорхой ажил зохиогоогүй, ариун цэврийн өрөө, усанд орох душ, оюутны амьдарч буй байранд цэвэрлэгээ ариутгал хийгдээгүй;
-ШУТИС-ийн харьяа оюутаны байранд тус сургуулийн 21 багш, ажиллагсад амьдарч өрөө тасалгаа цөөрснөөс 1 тасагт 5-6 оюутан сууж байгаа нь эрүүл ахуйн нормоос 0,5 дахин их байгаа нь  өвчлөл  дамжих нөхцөл боломж бүрдүүлж байгаа;
-Барилгын коллежийн  захирлын тушаал гарч, сургуулийн захиргаанаас 30 мянган төгрөг төсөвлөж ойр зуурын эм халууны шил, парацетамол, миксагрип, фарингосепт, ношпа г.м зүйлийг бэлтгэсэн боловч энэ нь уг өвчнөөс шууд урьдчилан сэргийлэх боломжгүй эмүүд байгаа, /зарим эм нь хориглосон заалттай/
-Шалгалтанд хамрагдсан байруудын 90 хувьд эм хэрэгсэл байхгүй, амны хаалтыг оюутнууд өөрсдөө авч хэрэглэж байгаа;
-Шалгалтанд хамрагдсан оюутаны байрны 70 хувь нь мэргэжлийн байгууллагаар ариутгал халдваргүйтгэл хийлгээгүй;
-Их дээд сургуулийн хичээл сургуулийг хаах тухай шийдвэр гараагүй байхад Гурван-Эрдэнэ багшийн дээд сургууль хичээлийг 2009 оны 11 дүгээр сарын 03-ний өдрөөс 11 дүгээр сарын 10-ны өдрийн хооронд карантилж, ойр гэртэй орон нутгийн оюутнуудыг гэр рүү нь буцааж, хол гэртэй оюутнууд байрандаа байрлаж байгаа;
-Байнгын халдваргүйтгэлд хлорамин, хлорын шохойг хэрэглэж байгаа боловч ихэнхи байруудад нөөц бага, найруулах, хэрэглэх аргаа мэдэхгүй;
- Шалгалтанд хамрагдсан ихэнх оюутны байруудад биеийн эсэргүүцэл, дархлааг сайжруулах зорилгоор  зохион байгуулалтын арга хэмжээ аваагүй зэрэг зөрчлүүд нийтлэг байжээ.
Үүнээс үүдэн УМХГ  үзэхдээ:
-шалгалтанд хамрагдсан ихэнх оюутны байруудад биеийн эсэргүүцэл, дархлааг сайжруулах зорилгоор  хийсэн тодорхой ажлууд байхгүй, урьдчилан сэргийлэх арга хэмжээг нэр төдий хэрэгжүүлж байна.
-Байнгын халдваргүйтгэлд хлорамин, хлорын шохойг хэрэглэж байгаа боловч ихэнхи байруудад нөөц бага, найруулах, хэрэглэх аргаа мэдэхгүйгээс зөв хэрэглэж чадахгүй, шаардлага хангахуйц ариутгал хийгдэхгүй байна.
-Зөвхөн оюутны байранд  үйлчилгээ үзүүлж байгаа гэсэн ойлголт нийт оюутнуудад байгаа тул бусад оюутнуудыг хамруулах талаар мэдээлэл сурталчилгаа бүрэн хийгдээгүй байна гэж үзэж байна.

Цаашид авч хэрэгжүүлэх арга хэмжээний саналд:
-Нийт оюутныг ЭМД-д хамруулах
-Тандалт судалгаанд явж байгаа багш оюутны цалинг, урамшууллыг шийдвэрлэх
-Оюутны хотхонд нээгдсэн эмнэлгийн төсвийг шийдвэрлэх/ одоогоор ЭМШУИС хариуцаж байгаа/
-Оюутны хотхонд байгуулагдсан эмнэлэгүүдэд нийт сургуулиудын оюутнуудыг хамруулах, аль эмнэлэгт аль сургуулиудыг хамааруулах хуваарийг БСШУЯ наас гаргах, сурталчлах, мэдээлэл өгөх ажлыг зохион байгуулах зэргийг дурьдсан байна.

Б.Солонго

GoGo Facebook Хуудас
 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2313 санал өгсөн байна.

Дээшээ