АНУ-ын Коннектикут мужид Цахилгаан станц дэлбэрч, таван хүн амиа алдлаа

АНУ-ын Коннектикут мужийн Мидлтаун хотод “Kleen Energy” компанийн цахилгаан станцад дэлбэрэлт болсноор дор хаяж таван хүн амиа алдаж, 12 хүн шархджээ. Энэ талаар тус хотын мэр “Франс-Пресс” агентлагт мэдээлсэн байна.

Хотын мэр Себастьян Жулиано дэлбэрэлт болох үед станц дээр хэдэн хүн байсныг тогтоож чадаагүй байгаа учир амь үрэгдсэн болон шархдагсдын тоо цаашид өсч болзошгүй гэжээ. Цахилгаан станц хараахан ашиглалтад ороогүй байсан бөгөөд тохируулгын ажил хийгдэж байсан аж. Жулиано алан хядах ажиллагаа байж болох хувилбарыг эрс үгүйсгэж, “Хэн ч бөмбөг тавиагүй. Зүгээр л анхаарал болгоомжгүйгээс санамсаргүй болсон хэрэг” хэмээн мэдэгдсэн байна. Мөн тэрбээр дахин дэлбэрэлт болох юм уу, агаарт хорт хийх алдагдах аюул байхгүй гэжээ.

Урьдчилсан байдлаар дэлбэрэлтийн шалтгааныг “Kleen Power Plant” цахилгаан станц доторх хийн хоолойноос байгалийн хий алдагдсанаас болсон гэсэн дүгнэлт гарсан байна. Станцад 51 хүн тохируулгын ажил хийж байсан бөгөөд дэлбэрэлт болох үед хийн хоолойн цэвэрлэгээ хийгдэж байжээ.

Орон нутгийн засаг захиргааны төлөөлөгч станцыг туршилтын журмаар бүрэн хүчин чадлаар нь ажиллуулах үед хий алдагдсан гэж үзэж байна. Цахилгаан станцын гүйцэтгэл 95 хувьтай байсан бөгөөд энэ зун ашиглалтад орох байжээ.

Хийн хоолойг цэвэрлэхийн өмнө ихэнх ажилчныг станцаас гаргасан ч яг хэдэн хүн үлдсэн нь өнөөг хүртэл тодорхойгүй байна. Ажилчдыг нэрсийг жагсаалтаар нь тулган үзэж байж энэ тоо тодорхой болно. Тохируулгын ажилд хэд хэдэн компанийн ажилчид гэрээний дагуу оролцож байсан аж.

Хэргийн газар одоогийн байдлаар тусгай сургуультай ноходыг ашиглан эрэл хайгуул, аврах ажиллагаа явуулж байна. Станцын ойролцоо хээрийн эмнэлэг байгуулжээ.

Дэлбэрэлтийн хүч асар их байсан учир ажилчид долгионд нь цохигдон 10-12 метрийн хол шидэгдсэн байна. Хотын зарим байшингийн цонхнууд хагарчээ. Зэргэлдээх хотын оршин суугчид нь дэлбэрэлтийг мэдэрсэн байна. Тэд газар хөдөлж байгаа мэт түлхэлтийг мэдэрч, Мидлтаун хотын зүгт хар утаа, галын дөл гарахыг харжээ.

Орон нутгийн цагаар 11.30-д болсон дэлбэрэлтийн улмаас станцын хана нуржээ. Нуранги дор хүмүүс дарагдсан байж болзошгүйг үгүйсгэхгүй байна.

“Kleen Energy” цахилгаан станц нь 620 мегаваттын хүчин чадалтай бөгөөд байгалийн хийгээр ажилладаг. Энэхүү станц ашиглалтад орсон тохиолдолд Шинэ Английн хамгийн том цахилгаан станцын нэг болох юм.

С.Баяр http://niigmiintoli.mn/