Янукович тэргүүлж байна

Украины Ерөнхийлөгчийн хоёрдугаар шатны сонгуулийн саналын хуудасны 93,06 хувийг тоолоход, сөрөг хүчний удирдагч Виктор Янукович нийт саналын 48,41 хувь, Тимошенко 45,95 хувийн санал тус тус авсан байна.

Украины сонгуулийн төв хорооны дэд дарга Андри Махерагийн мэдээлснээр, сонгуулийн дүн даваа гарагийн орой гаргана гэсэн бол түүний хамтрагч Михиало Охедровскийгийн хэлснээр лхагва гарагаас нааш дүн тодорхой болохгүй аж. Украины Интер телевизийн мэдээгээр Виктор Янукович нийт сонгогчдын 49,6 хувийн санал, Юлия Тимошенко 44,5 хувийн санал авсан байна. Украины сонгуулийн хороо албан ёсны эцсийн дүнг хоёрдугаар сарын 17-нд танилцуулах юм.

Энэ жил 59 настай Янукович сонгуульд ялна гэдэгтээ итгэлтэй байгаа бөгөөд ням гарагийн орой "Интер" телевизийн нэвтрүүлэгт оролцон Тимошенко Ерөнхий сайдын албан тушаалаасаа огцрох бэлтгэлээ хийх хэрэгтэй гэж мэдэгдсэн байна. "Тимошенко албан тушаалаа хүлээлгэн өгөх бэлтгэлээ хийх хэрэгтэй болов уу, тэрбээр нөхцөл байдлыг мэдэрсэн байх. Би мэдээж хэрэгт эвслийн парламент байгуулан ажиллана. Би Ерөнхий сайдтайгаа хамтран ажиллах учраас энэ албан тушаалыг хаших өөр хүний нэрийг дэвшүүлнэ" гэж Янукович хэлжээ.

Янукович ялбал 1991 онд ЗХУ-ын харьяанаас гарснаас хойших Украины дөрөв дэх Ерөнхийлөгч болно. "Одоогоор сонгуулийн эцсийн дүнг тодорхойлоход хэтэрхий эрт байна. Сонгуулийн албан ёсны дүн гарах хүртэл бид санал бүрийн төлөө тэмцэнэ" гэж Тимошенко ням гарагийн орой мэдэгджээ.

Украины сонгуулийн дараа жагсаал болж магадгүй гэж ажиглагчид үзэж байгаа юм. "Бүс нутгийн нам"-ын удирдлага Киев хотын захиргаанаас сонгуулийн төв хорооны гадна жагсаал хийх зөвшөөрөл олгохыг хүссэн байна. Үүнээс гадна Тимошенко 2004 онд Янукович Ерөнхийлөгчийн сонгуульд ялсан дүнг эсэргүүцэн, сонгуулийн дүнг цуцалсан "Улбар" шар хувьсгалаа дахин зохион байгуулж магадгүй аж.

С.Отгонбаяр