Даян аварга А.Сүхбат цагаан хоолтон болж, мах амсалгүй бүтэн жилийн нүүрийг үзэж байна

Монголчуудын амьдрал

2010-02-27 16:29 GMT+8

Бөхийн хорхойтнууд байтугай бөх муухан гадарладаг хүн ч зөвхөн А.Сүхбатын барилдааныг үзэх гэж бөхийн өргөө рүү зүтгэдэг байсан үе бий. Үнэндээ ч тэр эр бяр, уран мэхийг гайхуулсан олон олон барилдаанаараа шуугиулж байсан нэгэн.

Харамсалтай нь дэндүү эрт зодог тайлан өөрөө ч, өрөөлийг ч гүн хямралд оруулаад авсан. Ийнхүү зодог тайлсан нь түүний нэгэн цочир алхам байлаа. Өдгөө тэрээр ясны бөх зангаа тавилгүй "Олимп" сургуулиараа болон бөхийн өргөөнд болох барилдаануудыг алгасалгүй үзэн хорхойгоо дарж яваа. Солонгосчуудтай хамтран Монголд сөжү үйлдвэрлэнэ хэмээн баахан хөл болоход нь олон хүн даян аваргаа архины бизнест хөл тавилаа хэмээн дургүйцэж байсан.

Энэ ч түүний бас нэгэн цочир шийдэл байсан гэхэд болно. Дархан Уул аймагт орших "Дамонтрейд" хэмээх "Ноёд" группын Г.Буяндоржийн архи, спиртийн үйлдвэрийг худалдан авсан нь багагүй хэл ам дагуулсан. Улаан буудайнаас спирт үйлдвэрлэх талаар "а" ч үгүй аварга маань ах А.Батсүхийгээ Дарханд томилж, архийг авдар авдраар нь үйлдвэрлэх тохиролцоо хийсэн гэдэг. Гэвч боловсон хүчин, инженер, ажилчдаа нэг нэгээр нь алдсаар уяач А.Батсүх нэг л өдөр үйлдвэрийг нь зогсоож, эргээд адуу малаа бараадсан гэдэг юм билээ. Энэ үед А.Сүхбат аварга "хөөрхөн" мөнгөөр үнэ цохиж авсан бизнесээ дампууруулахгүйн тулд хамтран ажиллах байгууллага, гарц хайж эхэлсэн гэдэг. Чингээд Солонгосын нэгэн компанийн хөрөнгө оруулалтаар цагаан будааны архи буюу сөжү үйлдвэрлэн, дотоодын зах зээлд нийлүүлэхээр шийдэн өдөр судраа ч товлож байсан. "Монголд үйлдвэрлэсэн сөжү" нь мэргэн санаа байсан авч төд удалгүй сураг гарахаа больсон.

Түүний ээлжит цочир "бэлэг"-ийн нэг нь ерөнхийлөгч Ц.Элбэгдоржид "Тунхаг бичиг" илгээсэн явдал. Даян аварга тунхагтаа "Би улсад гурав түрүүлэхдээ нийтдээ гурван сая төгрөгийн шагнал авсан. Би маш их бэлтгэл сургуулилт хийж, ядарч сульдан, ялж ялагдаж байж амжилтад төрүүлсэн нэг нөхөр түрүү бөхийн шагналаас 40-50 дахин илүү 40-50 сая төгрөг өвөртөлчихөөд, тунаж барилддаг бидний ховор агшныг үзээд маасайтал инээгээд сууж байхыг нь харахаас ой гутдаг.

Цөөн хэдэн бөхчүүд л найраа авлигачдад идэгдэж, олон түмэнд нэр хүнд нь уначихжээ. Энэ байдлаа даруй засахгүй бол үзэгчид ирэхгүй, үзэхгүй болж Монгол бөх мөхөлд хүрэх нь. Монгол наадам, Монгол бөх шударга барилдаанаар үргэлж наадамчдаа баясгадаг. Би Монгол бөхийн сайн сайхны төлөө тэмцэх болно" хэмээсэн байдаг. Ажил хэргийг нь тойрсон энэ мэт зүйлээс гадна эхнэр Баясгалангаасаа өрх тусгаарлан 120 мянгатад залуухан бүсгүйтэй амьдарч байна гэгчлэнгийн хувийн амьдралыг нь тойрсон шуугиан ч тасраагүй. Харин тэрээр даян аварга Г.Өсөхбаярын цолны найр дээр эхнэрээ дагуулан ирснээр энэ ярианд цэг тавьж чадсан. Түүний бас нэг мэргэн санаа нь цагаан хоолтон болж, махнаас ангид байх шийдэл нь байв. Эр бяр нь жигдэрсэн бөх хүнд махнаас гарна гэдэг чоно махнаас гарахтай л адил хэрэг мэт санагдах биз, бусдад.

Гэсэн ч аварга цагаан хоолтон болж махнаас гарснаас хойш бүтэн жилийн нүүрийг үзэж байгаа аж. Өөрөө ч энэ тухайгаа болдог л юм байна хэмээн дотныхондоо ам алддаг гэнэ. Аварга маань махнаас гарсан ч таван хошуу мал дээр буга галуу тэргүүтнийг нэмэн арван хошуу малтай болоод байгаа. Max идэхгүй байж малаар яах нь вэ гэсэн сониуч заримынх нь амыг "мах идэхгүй ч малаа өсгөнө" хэмээн таглаж суудаг гэнэ лээ. Харин аварга сүүлийн үед биллъярдад нугасгүй болж хожигдвол даагаа нэхэн хэдэн цагаар ч хамаагүй тоглодог болсон гэнэ лээ. Тамирчин хүний зан тэр биз. Ийнхүү МУ-ын гавъяат тамирчин, даян аварга А.Сүхбат хамгийн их цочир алхам хийдэг бөхөөр тодрох нь бололтой.

GoGo Facebook Хуудас
 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2492 санал өгсөн байна.

Дээшээ