Нийслэлийн эрүүл мэндийн газрын даргаар хэн томилогдов

Нийслэл таймс

2010-03-16 11:16 GMT+8

Энэ жил Эрүүл мэндийн салбар багагүй барцадтай байгаа. Монголд гахайн ханиадаар хүн өвчилж, өвчний вирүс хурдацтай тархснаар нэлээдгүй хүний алтан амийг авч одов. Энэ эрүүл мэндийн салбарын нэр хүндийг иргэдийн дунд унасан гэхэд болно. Хайхрамжгүй хандаж, гахайн ханиадны вирүсыг хөдөө орон нутаг руу алдсан гээд олон шүүмжлэлд өртөж байв.

Эрүүл мэндийн салбарын энэ асуудал үүгээр зогссонгүй. Амаржих газрын хариуцлагагүйгээс хүйн халдвар гарч, нялхас эндлээ. Төрөх эмнэлэгийн дээврээс ус гоожиж, эхчүүд "айл"-д толгой хоргодов. Хувийн эмнэлгүүд эхчүүдийг авахдаа болзол тавьж, эрүүл мэндийн салбарыг нэг л бишдсэнийг сануулах мэт. Ар араасаа хөвөрсөн энэ олон асуудлаас үүдээд Нийслэлийн Эрүүл мэндийн газрын даргын суудал ганхаж эхэлсэн. Олны дунд "Ц.Ганхүү ажлаа өгөхгүй гэсэн. Хүний өмнөөс хариуцлага үүрчихлээ. Шинэ дарга томилох асуудалд хэн нэгэн эрх мэдэлтний гар оролцсон. Ц.Ганхүүгийн суудлыг булааж байгаа" гэлцэх яриа чих дэлсэх болов. Тэгвэл Нийслэлийн Эрүүл мэндийн газрын даргын халаа солионы асуудал өнгөрөгч баасан гаригт бүрэн шийдэгдсэн байна. Нийслэлийн Эрүүл мэндийн газрын даргаар С.Туул томилогджээ. Хүмүүсийн дунд С.Туул гэж хэн бэ гэсэн асуулт хөвөрч байна.

Тэрээр удам дамжсан эмч
Тэрээр 1959 онд Улаанбаатар хотод төржээ. Бүрэн дунд боловсрол эзэмшсэний дараа буюу 1984 онд Анагаах ухааны дээд сургуулийг Хүүхдийн эмч мэргэжлээр төгссөн байна. С.Туул тус сургуульд зургаан жил суралцаж төгсөөд Клиникийн нэгдүгээр амаржих газар арав гаруй жил ажиллажээ. Улмаар 1994 оноос өнөөг хүртэл их бага хэмжээний удирдах ажил хийж яваа нэгэн аж. Өмнө нь Хүүхдийн Клиник сувилал ба хүүхдийн төвүүд Баянголын эрүүл мэндийн төвийн Нийгмийн эрүүл мэндийн тусламж, үйлчилгээ хариуцсан орлогч даргаар ажиллаж байжээ.

Түүнчлэн Баянгол эрүүл мэндийн нэгдлийн даргын ажлыг таван жил хашиж байгаад НЭМГ-ын даргын албан тушаалд томилогджээ. Нөхөр хоёр хүүхэдтэй аж. Хүү, охин хоёр нь хоёулаа амьдрал зохиосон байна. Түүний нөхөр нь хувийн нэгэн компаний захирлаар ажилладаг байна. С.Туул удам дамжсан эмч аж. Түүний аав Монгол Улсын эрүүлийг хамгаалахын гавъяат ажилтан Содномдаржаа юм. Эм зүйч мэргэжилтэй. Монгол Улсын эм хангамж үйлчилгээний газрын даргын ажлыг 20 жил хийсэн нэгэн гэнэ. Мөн социализмийн үед тариурын шар гэдэг өвчин их байсан цагт Солонгос улстай хамтарсан нэг удаагийн зүү тариурын үйлдвэр буюу "Мон сан" компанийг байгуулж байжээ. Уг компаний захирлаар ажиллаж байгаад тэтгэвэрт гарсан байна. Ээж нь бас эмч мэргэжилтэй ажээ.

С.Туул гурван дүүтэй, айлын том охин юм байна. Дүү нар нь бүгд төрийн байгууллагад өөр өөрсдийнхөө мэргэжлийн дагуу ажиллаж байна. Нэгдүгээр амаржих газар ажиллаж байхдаа Нярайн мэргэжил дээшлүүлэх курст ОХУ-д нэг жилийн хугацаатай мэргэжил дээшлүүлсэн байна. Түүнчлэн Шанхай хотод гэр бүл төлөвлөлтийн асуудлаар олон улсын сургалтанд хамрагдаж байжээ. Дараа нь Хятадад эрүүл мэндийн байгууллагын төлөвлөлт, зохион байгуулалтын талаар сургалтанд хамрагдсанаас хадна дотоодын сургалтуудад олон удаа хамрагдаж байсан аж. Тэрбээр 20 дахь жилдээ эрүүл мэндийн салбарт ажиллаж байгаа бөгөөд 16 дахь жилдээ эрүүл мэндийн салбарт удирдах ажил хийж байжээ. Бусад хугацаанд нь мэргэжлээрээ ажиллаж байсан аж.

Хүмүүс атаархсандаа юу ч гэж хэлж болно шүү дээ”
Нийслэлийн Эрүүл мэндийн газрын дарга С.Туултай цаашид хийх ажлынх нь талаар хөөрөлдлөө.

-Шинэ ажилд томилогдоод удаагүй байна. Ажлаа юунаас эхэлье гэж төлөвлөж байна вэ?
-Ажил аваад удаагүй байгаа ч энэ салбарт ажиллаж байсны хувьд бодож явдаг ажлууд бий л дээ. Эрүүл мэндийн яамнаас 2010 оныг эрүүл мэндийн салбарыг цогцоор нь шинэчилье гэсэн зорилт дэвшүүлсэн. Энэ зорилтын хүрээнд бүтэц зохион байгуулалтын бодлогын чанартай өөрчлөлтүүд хийгдэх байх. Дараа нь эх, нялхсын асуудал байна. Хамгийн түрүүнд амаржих газруудын хэвийн үйл ажиллагааг хангах ажил яригдана. Хүүхдийн эрүүл мэндийн асуудал жаахан сул юм шиг санагддаг. Мөн XXI зууныг шинээр болон дахин сэргэх магадлалтай халдварт өвчний зуун гэж нэрлээд байгаа шүү дээ. Тандалт судалгааны албанаас энэ чиглэлээр тав, арван жилээр гарах өвчлөлүүдийг тодорхойлчихсон байдаг. Тиймээс энэ асуудал дээр анхаарч ажиллах хэрэгтэй юм. Нийгмийн бусад салбаруудын дундын оролцоог эрчимжүүлэх хэрэгтэй байна. Иргэдэд эрүүл мэндийн боловсрол олгох шаардлагатай. Засгийн газраас бодлогын чанартай асуудлуудыг шийдвэрлүүлэх бодолтой байна.

-Эрүүл мэндийн салбар энэ жил жаахан барцадтай байх шиг. Энэ ажлыг авахдаа эмээж байв уу?
-Гайгүй байх аа гэж бодож байна. Ямар ч байсан өөрийнхөө санасан бодсон, зорьж яваа зүйлээ хийгээд үзье л гэсэн бодолтой байна. Нэгэнт итгэл хүлээлгэж төрийн албанд томилсон учраас надад ухрах бодол алга.

-Таныг энэ суудалд хэн нэгэн албан тушаалтны татаасаар гарч ирсэн гэх яриа байна. Энэ талаар?
-Тийм яриа байгааг хэвлэл мэдээллийн хэрэгслүүдээс мэдсэн. Хүмүүс атаархсандаа юу ч хэлж, ярьж болно шүү дээ. Энэ ярианд нэг их эмзэглэхгүй байна. Би энэ албанд томилогдохдоо хэн нэгнээр туслуулсан юм байхгүй ээ.

Ер нь бол НЭМГ-ын даргыг өөрчлөх асуудал хоёр жилийн өмнөөс л яригдаж байсан. Эрүүл мэндийн яам судалгаа явуулсан юм шиг байгаа юм. Тэр судалгаанд миний нэр байсан юм билээ. Ингээд л намайг томилсон байх гэж ойлгож байна.

-Төрөх эмнэлэгүүдийн асуудал юу болж байгаа вэ. Ажилтайгаа танилцаж амжив уу?
-Өнгөрөгч баасан гаригт ажлаа хүлээж авсан. Амралтын өдрүүдэд эрүүл мэндийн аппаратынхаа ажилтай танилцаж дууслаа. Маргаашнаас төрөх эмнэлэгүүд болон бусад харьяа газруудаар явах гэж байна. Нийслэлийн Эрүүл мэндийн харьяа 29 байгууллага байдаг. Энэ байгууллагуудаар орно. Хамгийн түрүүнд төрөх газруудын асуудлыг жигдлэх саналтай байгаа. Дараагаар нь хүүхдийн эмнэлэгүүдийн асуудалд орох байх. Дүүрэг болгонд хүүхдийн эмнэлэгийн асуудлыг шийдэх бололцоо нь юу байна вэ гэдэг судалгааг хийгээд аль болох шийдвэрлэх талын арга хэмжээг авна даа.

Төрөх эмнэлэгийн асуудал хүнд байна. Сая гаруй хүн амтай болчихоод байхад ганцхан төрөх эмнэлэг дээр бүх ачаалал ирчихсэн. Энэ бол эрсдэлтэй зүйл. Төрөх эмнэлэгүүдийг нэмж барих, засварлах нь нэн шаардлагатай байна.

-Сүүлийн үед эрүүл мэндийн салбарынхан хариуцлага алдах нь ихэслээ. Та ийм хүмүүстэй хэрхэн тэмцэх вэ?
-Хариуцлага алдлаа гээд загнаж хашгирахаа урьтал болгохгүй. Эрүүл мэндийн салбарынхны нийгмийн асуудал нь хүнд байдаг. Бас дээрээс нь ачаалал ихтэй ажилладаг. Ийм их ачаалалтай ажиллаж байгаа хүмүүсийг лантуугаар цохиж байгаа юм шиг хандаад байвал ажил урагшлахгүй. Хүн урмаар амьдардаг. Хүмүүсээ өмөөрч толгойг нь илж байгаа юм биш. Үнэхээр болохгүй байгаа бол хариуцлага тооцолгүй яах вэ. Эрүүл мэндийн салбар сахилга хариуцлагыг өндөрт авч явах ёстой.

Ж.Тагтаа

GoGo Facebook Хуудас
 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2436 санал өгсөн байна.

Дээшээ