Монгол хэл бичгийн улсын олимпиад боллоо

"НИЙГМИЙН ТОЛЬ"

2010-06-07 17:34 GMT+8

Хонгор нутгийн Өлзийт сумын уугуул, Төрийн шагналт, гавъяат багш, академич, хэл шинжлэлийн ухааны доктор, профессор Шадавын Лувсанванданы мэндэлсний 100 жилийн ойг тохиолдуулан энэ жилийн Монгол хэл бичгийн улсын олимпиадыг нэрт эрдэмтний нэрэмжит болгон, зохион байгууллаа.

Олимпиад гавъяат багш Н.Биндэрьяагийн нэрэмжит "Номгон" ахлах сургууль дээр явагдсан. Уг олимпиадыг олимпиад зохион байгуулах хороо, аймгийн ИТХ, ЗДТГ, Боловсрол соёлын газар, "Номгон" ахлах сургууль хамтран зохион байгууллаа.

Олимпиадыг зохион байгуулах хорооны даргаар МУБИС-ийн Монгол судлалын сургуулийн захирал, гавъяат багш, доктор, профессор Ц.Өнөрбаян ажиллав.

Олимпиадад 21 аймаг, Улаанбаатар хотын есөн дүүргээс шалгарсан багш сурагчид оролцож, эх хэлний мэдлэг, чадвараа сорьж, уралдлаа. Багш нараас Говь-Алтай аймгийн Бигэр сумын сургуулийн багш Д.Буяннэмэх тэргүүлж, Ховд аймгийн Цаст-Алтай цогцолбор сургуулийн багш В.Янжиндулам, Улаанбаатар хотын Баянгол дүүргийн 51 дүгээр сургуулийн багш Д.Оюун нар удаалсан.

Сурагчдаас А.Одмаа (Дорноговь) алтан медаль, С.Хандмаа (Улаанбаатар хотын Баянзүрх дүүрэг) М.Билгүүнчимэг (Баянхонгор Номундалай) мөнгөн медаль, П.Цэнд-Аюуш (Өвөрхангай), О.Сэр-Од (Архангай), А.Номин-Эрдэнэ (Завхан) нар хүрэл медаль авч МУИС, МУБИС-д төлбөргүй суралцах эрхийн бичгээр шагнуулсан байна.

П.Санаадагва http://www.niigmiintoli.mn/

GoGo Facebook Хуудас
 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2375 санал өгсөн байна.

Дээшээ