Сэгс цагаан богд найраглал зохиолч Нямгаваагийн бодит амьдралаар бичигджээ

Монголчуудын амьдрал

2010-06-12 14:59 GMT+8

Ардын уран зохиолч Пүрэвдорж гуайн бүхий л зохиолыг уншаагүй сонсоогүй Монгол хүн гэж үгүй биз ээ. Тэр дундаа Сэгс цагаан богд найраглалыг хүүхэд байхаасаа уншиж цээжилдэг Монголчуудын хувьд дуртай найраглалынх нь бүтсэн түүх маш сонирхолтой байх ажээ.

Учир нь энэхүү найраглалын жинхэнэ үйл явдал нь бодит амьдрал дээр байсан төдийгүй найраглалын гол дүрийн баатар хотын залуу нь Нямгаваа зохиолч гэнэ. Хосгүй авъяастай хоёр зохиолч маань үй зайгүй андууд бөгөөд Нямгаваа зохиолчийн бага залууд тохиолдсон явдлаас санаа ургуулан бичсэнээр энэхүү алдартай найраглал олонд түгэх болсон байна.

Нямгаваа зохиолч хорин хэдхэн настайдаа нам засгаас бичсэн ном зохиолоо өндрөөр үнэлүүлж одон тэмдгээр энгэрээ цоолуулж гэнэ. Үргэлж шинийг эрэлхийлэн байдаг хэсэг уран бүтээлчдийн дунд хоёр найз ч байх бөгөөд говь нутгаар шинэ бүтээлийн санаа хайхаар аялалд гарчээ.

Ингэж явахдаа говь нутгийн нэгэн тэмээчнийд зочилсноор Нямгаваа зохиолч говийн бор охинд сэтгэл алдарчээ. Ботгон бор нүдтэй ер хөдөөнийх гэмээргүй цэвэрхэн бор охиноос харцаа салгаж чадахгүй байсныг хамт явсан нөхөд нь тоглоом наадам болгон шуугидаг байж.

Харин зохиолч маань танилцаж ярилцах гэж бүхий л аргыг сэдсэн боловч нэмэр болохгүй өнөөх ботгон нүдтэй охин нь нэг ч үг хэлэхгүй болохоор хэсэг хугацааны дараа нутаг буцах болж. Аргаа барсан зохиолч энгэртээ зүүж явсан шинэхэн тэмдгээ дурлалт охиндоо дурсгал болгон өгөх гэтэл хавь ойрын залуус хошигнон инээлдэж байж гэнэ. Сандарсандаа охины хөтөлж явсан тэмээний магнай дахь хадганд  нь одонгоо тогтоочихоод гүйхээрээ машиндаа сууж байсан юм гэдэг. Хотын залуу нутаг буцаж ботгон нүдтэй бүсгүй хөдөөнөө үлдсэн ч тун удалгүй шувуу бүхэнд үг заагаад, шуудан бүхэнд захиа дайгаад эхэлсэн нь говь нутгийн тэмээчин бүсгүйд хүрч захидлыг задалвал:
Тэнэгэр говийн тэмээчин бүсгүй сайн байна уу? хэмээн эхэлсэн байжээ. Бүрэг ичимхий зангаасаа сэтгэлтэй залуудаа нэг ч үг хэлж чадалгүй явуулсан бүсгүй сая л нэг зориг гарган сэтгэл нээж хариу захидал илгээж гэнэ. Хоёр нутгийнхаа сайхныг ярилцсаар дотносон нэгэн захидалдаа:
Намар та манайд ирэхдээ
Намайг ганц түлсэн шүү
Батиар биш дээ хүнийг та
Барьж харах шахсан шүү хэмээн гэгээхэн гомдол мэдүүлээд амжсан нь хожим хүн бүрийн сайн мэддэг том найраглал, оюуны үнэт олдвор болон үлджээ.

GoGo Facebook Хуудас
 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2394 санал өгсөн байна.

Дээшээ