Аялал жуулчлалын зарим бааз Монголчуудыг гадуурхдаг уу

"НИЙГМИЙН ТОЛЬ"

2010-08-13 14:28 GMT+8

ЯЛГАЖ ХАРЬЦАХ ЗӨВ ҮҮ
Манай зарим жуулчны бааз Монголчуудад үйлчлэхгүй, зөвхөн гадаадын жуулчдын өмнө л бидний хаалга нээлттэй хэмээсэн талаар иргэд гомдоллож байна. Эндээс Монгол хүн гадаадуудаас ямар нэг зүйлээр дутуу дулимаг хэмээн ойлгож болохоор байгаа юм. Магадгүй энэ нь хэтэвчин дэх мөнгөтэй, эсвэл Монголчууд хэтэрхий бүдүүлэг зэрэгтэй холбоотой байж болох юм. Гэхдээ хүмүүсийг ийн ялгаварлах нь хэр зохимжтой вэ.

Энэ талаар Мэргэжлийн хяналтын ерөнхий газрын мэргэжилтэн “Манайд том зах зээл байхгүй учир зөвхөн гадаад, дотоодод үйлчилнэ гэх боломжгүй. Хэрвээ тийм байлаа гэхэд бид тус байгууллагын дотоод журамд нөлөөлөх эрхгүй. Манайхаас ажлын хэсэг гарч Монгол Улсын хэмжээнд ажиллаж байгаа бүх жуулчны бааз болон амралтын газруудыг шалгаж эхэлсэн” гэв. Шалгалт ирэх сарын 25-ны өдөр дуусч, дүнг нь есдүгээр сарын 1-нд тайлагнах аж.

Аялал жуулчлалын зарим бааз Монголчуудыг гадуурхдаг уу Иргэд буруу ойлгож гомдол гаргасан байж магадгүй Жуулчны баазад нь зориод очиход “манайх Монгол иргэдийг хүлээж авахгүй” гэсэн шалтгаанаар буцааж буй нь хэр зохимжтой болох талаар Аялал жуулчлалын үндэсний төвийн дэд захирал Н.Молороос тодрууллаа.

-Зөвхөн гадаад жуулчдад үйлчилнэ гээд зориод очсон Монгол иргэдийг буцаасан тохиолдол байна. Жуулчны баазууд ямар тохиолдолд Монгол иргэдийг хүлээж авдаггүй юм бэ?
-Ер нь аливаа жуулчны баазийн дотоод үйл ажиллагаа, үнэ тарифыг улсаас, эсвэл ямар нэг байгууллагаас тогтоох боломжгүй. Тиймээс зөвхөн гадаад жуулчдыг хүлээж авдаг бааз байвал бид боль гэх эрхгүй. Гэхдээ манайд өнөөдөр үйл ажиллагаагаа явуулж буй баазуудаас зөвхөн гадаад жуулчдад үйлчилдэг газар байхгүй. Яахав зуны цагт жуулчид ирдэг оргил үеэр Монгол иргэдээ хүлээж авах боломжгүй. Эсвэл гадны жуулчдын амар тайван байдлыг хангах гэж хүлээж авахгүй байх тохиолдог аль ч баазад байнга л гардаг. Манайхан чинь чанга дуутай, шөнө унтаж амрахгүй найрладаг улс. Тиймээс жуулчдаас гомдол их ирдэг болохоор иргэд буруу ойлгож ийм гомдол гаргах нь бий л дээ.

-Аялал жуулчлалын салбараас жилд манай улсын төсөвт хэчнээн төгрөг оруулдаг вэ?
-Аль улсаас хэчнээн жуулчин ирж, хэд хонож байна. Ямар хүнсний бүтээгдэхүүн хэрэглэж байгаа зэргийг нь нь судалж үзээд жилдээ 200 сая гаруй ам.доллар байдаг гэж тогтоосон.

УЛСЫН ТӨСӨВТ ОРУУЛЖ БАЙГАА МӨНГӨ ЧАМЛАЛТТАЙ
Манай улсад сүүлийн жилүүдэд аялал жуулчлал хурдацтай хөгжиж байна. Гэвч энэ салбараас улсын төсөвт оруулж буй мөнгө тийм ч их биш аж. Энэ байдалд мэргэжлийн хүмүүс ч багагүй ундууцдаг байна. Одоогоор манайд бүртгэлтэй жуулчны бааз 310 гаруй байдаг ч тэдний гурав нь гадны хөрөнгө оруулалттай аж. Гадны хөрөнгө оруулалттай баазуудад ирсэн жуулчид манай улсад зочилсноор музей үзэх тасалбар, шатахууны мөнгө төдийхөнд л орлого оруулдаг байна. Хэрвээ Солонгосын хөрөнгө оруулалттай бааз байвал солонгос иргэдээ Монголд ирүүлж, өөрийнхөө хөрөнгөөр бэлдсэн бүхнээрээ дайлаад буцаадаг аж. Тэд солонгос баазад ирж, тус улсын үндэсний хоолоор хооллож, солонгос хэлмэрчинтэй нь явж байгаад аялалаа дуусгадаг аж.

Тиймээс аялал жуулчлалын салбараас ахиу мөнгө олохын тулд дотоодын хөрөнгө оруулалттай компанийг илүү дэмжих нь ашигтай аж. Байгаль орчин, аялал жуулчлалын яамнаас “Аялал жуулчлалын үндэсний хөтөлбөр”-ийг батлуулахаар бэлтгэж байгаа аж. Хэрвээ хөтөлбөрт баазуудын үйл ажиллагаанд зохицуулалт хийх боломжийг тусгаад өгчихвөл манай улсад жуулчдаас орж ирэх орлогыг сайжруулах нэг гарц болох гэнэ.

Ж.Солонго http://www.niigmiintoli.mn/

GoGo Facebook Хуудас
 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2430 санал өгсөн байна.

Дээшээ