ТОЙМ: Тэд шинэ ТҮҮХИЙН ЭЗЭД

Баяртай "Рио 2016", Сайн байна уу, Токио

Өнгөрсөн 17 хоногийн хугацаанд таван тивийн шилдэг тамирчид өндрөөс өндөрт, хурднаас хурдан, хүчтэнээс хүчтэй уриан дор өрсөлдөж, дэлхийн сая сая үзэгчдэд спортын гайхамшгийг мэдрүүллээ. Риогийн олимпийн наадам олон аваргуудыг төрүүлж, дээд амжилтуудыг эвдсэн гэнэтийн бэлгээр дүүрэн байлаа. Риогийн олимпоос шинэ залуу аваргууд төрөн гарсан бол их спортоо орхиж, албан ёсоор зодог тайлсан тамирчид мөн цөөнгүй байна.


ШИНЭ ЦАГИЙН ФЕЛПС БУЮУ "ТӨМӨР ХАТАГТАЙ" КЕТИ ЛЕДЕКИ

Кети Ледеки дөнгөж 15 настайдаа олимпийн наадмаас эмэгтэйчүүдийн 800 метрийн чөлөөт сэлэлтийн төрөлд алтан медаль хүртэж дэлхий нийтийн анхаарлыг татаж байсан. Тэгвэл тэрээр Риод дөрвөн алт, нэг мөнгөн медаль хүртэж, шинэ амжилтын эзэн боллоо. Усанд сэлэлтийн спортыг бүх цаг үеийн шилдэг тамирчин Майкл Фелпсийн замгалжлагч хэмээн Кетиг нэрлэж байна.

ЖҮДО БӨХИЙН НЭГЭН ШИНЭ ОД ФАБИО БАСИЛЕ

Риогийн олимпийн нэгэн тод од бол жүдо бөхийн 66 кг жинд өрсөлдөж, Олимпийн аварга болсон Италийн Фабио Басиле. Анхны олимпдоо түрүүлж, олимпийн аварга болсон Фабио жүдо сонирхогчдын таамгийг өөрчиллөө.

ДАХИН ДАВТАГДАШГҮЙ СИМОНА БАЙЛЗ

Сүүлийн гурван жил дараалан спортын гимнастикийн ДАШТ-ий олон төрөлтөд түрүүлсэн анхны гимнастикч болж, шуугиан дэгдээж байсан АНУ-ын тамирчин Симона Байлз Риогийн олимпод мөн адил сенсааци дэгдээлээ. Симона Байлз Риогийн олимпоос таван алтан медаль хүртэх зорилготой ирсэн боловч тэрээр дөрвөн алт, нэг хүрэл медаль хүртлээ. Энэ бол Америкчуудын хувьд чамлахааргүй амжилт. Гэвч Симона зорилгодоо хүрч чадаагүйдээ гунигийн нулимс унагаав.

"ЗАГАСАН ХҮН" ФЕЛПСИЙГ АРДАА ОРХИСОН СИНГАПУР ЗАЛУУ

21 настай Жозеф Скүүлинг 100 метрийн эрвээхэй сэлэлтэд "загасан хүн" Майкл Фелпсийг ардаа орхин түрүүлж, Сингапурын анхны олимпийн аварга боллоо. Тэрээр 50.39 секундэд зайгаа туулж тив, дэлхийн дээд амжилтыг шинэчлэн тогтоосон юм. 2008 оны Бээжингийн олимпийн үеэр 13 настайдаа Фелпстэй хамт авахуулсан зураг нь Жозефийн амжилтыг улам бүр онцгой болгон, "Шүтээнийхээ өмнө гишгэсэн" залуу гэж нэрлэв.

ТЭД ИХ СПОРТЫН ЗАМНАЛАА ЯГ ИНГЭЖ ӨНДӨРЛҮҮЛЭХИЙГ ХҮССЭН

Дэлхийн хамгийн хурдан хүн Усайн Болт 2008, 2012 оны олимпийн наадамд 100м, 200м, 4х100м-ийн уралдаануудад бүгдэд нь түрүүлж, алтан медаль хүртэж байсан тэрээр Риогийн олимпийн наадамд ч мөн уламжлалаа эвдсэнгүй. Болт "требль-требль" буюу гурван олимп дараалан 100, 200, 4x100 гэсэн гурван төрөлд аваргалсан түүхэн амжилтын эзэн боллоо. Ямайкийн домогт тамирчин инйхүү алтан медалиар олимпоос “зодог” тайллаа.

Усанд сэлэлтийн спортын бүх цаг үеийн хамгийн шилдэг тамирчин Майкл Фелпс Риогийн олимпоос таван алт, нэг мөнгөн медальтай буцаж байна. 23 дахь медалиа авсаны дараа домогт тамирчин Фелпс их спортоо орхихоор шийдсэнээ мэдэгдлээ. Тэрээр гэр бүлийнхэндээ цаг хугацаагаа зориулахаар шийдсэн байна. Майкл Фелпс таван олимпоос 23 алт, хоёр мөнгө, хоёр хүрэл медаль хүртэж, усанд сэлэлтийн спортын түүхэнд тодоор бичигдсэн үлдлээ.