ТОЙМ 2016: Технологийн салбарын онцлох үйл явдлууд
А.Ихсанаа Сэтгүүлч

2016 онд технологийн салбарт болсон онцлох үйл явдлуудыг тоймлон хүргэж байна.

Өнгөрч буй 2016 онд технологийн салбарт болсон бусад үйл явдлуудыг та доорх нийтлэлээс уншаарай. Шинэ мэдээллийг эхэнд оруулах үүднээс дарааллыг нь арван хоёрдугаар сараас эхлүүлсэн болно.

Арван хоёрдугаар сар Yahoo-гийн нэр хүнд шалан дээр

Нэгэн цагт зах зээлийг ноёлж байсан GoPro компани ажилчдынхаа 15 хувийг цомхотгож, бүтцийн өөрчлөлт хийж буйгаа зарлав. Компанийн 200 ажилтан халагдсан төдийгүй, энтертайнмент хэлтэс татан буугдаж, энэ бүхнээс болоод компани 24-33 сая ам. долларын алдагдал хүлээж магадгүй гэжээ.

Нэгдүгээрт GoPro дронын зах зээлд хүч үзэхээр Karma хэмээх бүтээгдэхүүн танилцуулсан боловч төд удалгүй цахилгааны гэмтлээс шалтгаалан эргүүлж татахаар болсон юм. Хоёрдугаарт зах зээл дээр тэднээс дутахааргүй үзүүлэлт бүхий, илүү хямд үнэтэй камер ихээр гарч иржээ.

Үүнтэй нэгэн адил интернет ертөнцийн салшгүй нэг хэсэг байсан Yahoo компани дахин хакеруудад мэдээллээ алдсан гэдгээ олон нийтэд дэлгэв. Компани 2013 оноос хойш хоёр удаа томоохон халдлагад өртөж эхний удаад нэг тэрбум, дараагийн удаад хагас тэрбум гаруй хэрэглэгчийнхээ нэр, цахим шуудангийн хаяг, утасны дугаар, төрсөн өдөр, нууц үг зэргийг алджээ.

Энэ оны долдугаар сард бизнесийнхээ зарим хэсгийг Verizon-д 4,8 тэрбумаар зарах тохиролцоонд хүрч чадсан Yahoo ийнхүү хоёр том халдлагын тухай мэдээлэхээс өөр аргагүй болж хэрэглэгчид болон, хөрөнгө оруулагчдын аль алиных нь итгэлийг хөсөрдүүлсэн юм. 

Арван нэгдүгээр сар – Дубайчууд Hyperloop-ийн анхны зорчигчид болно

Гар утастай холбоотой асуудал нь намжаагүй байхад Samsung-ын үйлдвэрлэсэн угаалгын машин мөн ижил асуудал дагуулав. Харин Германчууд дэлхийн анхны ус төрөгчөөр ажилладаг галт тэргийг хэрэглээнд нэвтрүүлэхээр болсон гэдгээ зарлаж, 5G сүлжээ ашиглан алсаас робот удирдах технологийг туршиж байгаа гэдгээ мэдэгдсэн юм.

Тэгвэл энэ оны эхээр анхны туршилтаа амжилттай хийсэн Hyperloop One Дубай хоттой гэрээ хийж, хөрөнгө оруулалт авахаар болжээ. Элон Маскын санаачилсан шинэ цагийн, өндөр хурдны тээврийн хэрэгслийг бодит амьдралд нэвтрүүлэх анхны хот нь ийнхүү Дубай болох юм.

Өнөөдөр машинаар хоёр цаг гаруй явж хүрдэг замыг Hyperloop ердөө 12 минутад туулах аж. 

Аравдугаар сар – Хагацъя даа Samsung NOTE 7

Худалдаанд гараад сар хүрэхгүй хугацааны дараа хэрэглэгчдээс дэлбэрч байна гэх гомдол ирсний дагуу Өмнөд Солонгосын Samsung компани Note 7 утасны борлуулалтыг зогсоож, хэрэглэгчдийн утсыг сольж эхэлсэн.

Харамсалтай нь сольж өгсөн утас хүртэл асуудалтай байсан учраас компани үйлдвэрлэлийг нь зогсоож, худалдан авсан хүмүүсийг буцааж өгөхийг хүссэн юм. Алдагдлын хэмжээ 5 тэрбум ам. доллар давж магадгүй талаар шинжээчид таамаглаж, Samsung компани өрсөлдөгчийн Plus загварыг давж чадах ганц бүтээгдэхүүнээ худалдаанд гаргах гэж хэт яарснаас болж ийм хямралд өртсөн гэж хүмүүс үзэх болов.

Есдүгээр сар – Чихэвчээ яах уу?

Өнгөрч буй 2016 оны ес, аравдугаар сар тэр чигтээ iPhone-ийн амжилт, Samsung-ын хямрал хоёроор дүүрчээ. Чихэвчийн оролтыг өөрөөр шийдэж, багтаамжийн хэмжээг 32GB, 128GB, 256GB болгон өөрчилж, үндсэн товчлуурыг нь дэлгэцээр орлуулсан бүтээгдэхүүн зах зээлд нэвтэрсэн цаг мөчтэй зэрэгцэн Samsung компани Note 7 утасныхаа борлуулалтыг зогсоож, эргүүлэн татахаар болсон гэдгээ зарлав.

Apple-ийн хувьд том завшаан гарч ирсэн бөгөөд ирэх 2017 онд iPhone-ийн 10 жилийн ойд зориулсан эрс өөрчлөлтүүд нь төдий л асуудал дагуулалгүй өнгөрчээ.

Яг энэ сард дронын салбарт шинэ өрсөлдөгч гарч ирэв. Камерын бизнес эрхлэгч GoPro компани Karma хэмээх дрон танилцуулсан бол Хятадын DJI мөн л Mavic Pro дроноо танилцуулсан юм.

Гэвч худалдаанд гаргаад хоёрхон долоо хоногийн дараа GoPro компани дроноо эргүүлэн татсан бол DJI Mavic Pro оны шилдэг дрон болжээ. Эдгээрээс гадна Yahoo компани хэдэн жилийн өмнө 500 сая хэрэглэгчийнхээ мэдээллийг алдсан гэдгээ олон нийтэд зарлаж, Хятадын аварга том радио телескоп ажиллаж эхлэв.

Наймдугаар сар – ХЯТАД: Uber-ийн салбарыг бид авлаа

Гурван сарын өмнө Apple-аас нэг тэрбум ам. долларын санхүүжилт авахаар болсон DiDi Chuxing компани Uber China-г эзэмшихээр болж буйгаа зарлав. Бүтэн хоёр жил Хятадын зах зээлд тэсэж үлдэхийн тулд хоёр тэрбум ам. доллар зарцуулсан Uber компани өөр аргаар үзэхээр шийдсэн хэрэг.

Гэрээ ёсоор Didi Chuxing компани Uber China-г эзэмшиж, хариуд нь Uber Хятадын компанийн 20 хувийг эзэмшихээр болсон юм. Didi Chuxing-ийн зах зээлийн үнэлгээ 28 тэрбум, Uber China-ийн үнэлгээ 7 тэрбум ам. доллартой тэнцэж байсан бөгөөд гэрээний ачаар компанийн үнэлгээ 35 тэрбумд хүрч, хөрөнгө оруулагчдад ч таалагдах болжээ.

Харин Өмнөд Солонгосын Samsung компани энэ сард өөрсдийн түүхэнд байгаагүй гамшгийн шалтгаан болсон Galaxy Note 7 бүтээгдэхүүнээ танилцуулсан юм. Apple-ийн iPhone-той энэ тэнцүү өрсөлддөг Galaxy S цувралын нэршил нь Note загвараасаа түрүүлж яваад байсан учир компани Note 6 хэмээх нэршлийг алгасаж 7 гэж нэрлэжээ.

Харамсалтай нь бүтээгдэхүүн зах зээл дээр гараад сар бололгүй асуудал дагуулж эхэлсэн билээ.

Долдугаар сар – Сайн уу ЮПИТЕР

Сансар судлалын хувьд энэ жилийн хамгийн онцгой үйл явдал долдугаар сард болов. Нью Йоркийн цагаар долдугаар сарын 4-ний өдрийн 23:18 цагт буюу Улаанбаатарын цагаар долдугаар сарын 5-ны 12:18 цагт сансарт таван жил аялсан Жюно хөлөг зорьсон газартаа хүрсэн юм.

Бархасбадийн тойрог замд өмнө нь хэзээ ч ойртож байгаагүйгээр ойртсон энэ хөлөг бидний хэзээ ч харж байгаагүй Бархасбадийг харуулахын сацуу, манай нарны аймгийн хамгийн том гаригийн үүх түүхийг хүүрнэх зорилготой.

Бүтэн жил хагас үргэлжлэх судалгааны хөлгийг бүтээх, хөөргөх гээд төслийн нийт зардал 1,13 тэрбум доллартой тэнцжээ.

Харин энэ үеэр дэлхий дээр iPhone 7 утасны хулгайн зураг цацагдаж, нарны эрчим хүчээр ажилладаг Solar Impulse 2 хөлөг дусал шатахуун ашиглалгүйгээр дэлхийг амжилттай тойрсон юм.

Зургадугаар сар – iOS 10 ба түүний нөхөд

Элон Маск хүн төрөлхтнийг симуляци байж магадгүй гэсэн таамаг дэвшүүлж, Украйнд дроноор хүргэлт хийх засгийн газрын шийдвэр гарч, Xiaomi компани Microsoft-ын 1500 патентыг худалдаж авахаар болсон зэрэг олон үйл явдал давхацсан зургадугаар сард Apple компани жил бүр уламжлал болгон зохион байгуулдаг WWDC чуулганаа нээв.

Чуулганы хувьд хамгийн чухал нь мэдээж хэрэг үйлдлийн систем. iOS 10 үйлдлийн систем, watchOS 3 үйлдлийн систем, macOS Sierra. Худалдаанд гараад ердөө жил гаруйхан хугацаа өнгөрч байсан Apple Watch-ын шинэ үйлдлийн систем аппликейшн ачаалах хугацааг долоо дахин хурдлуулж, хэрэглэгчид Хятад ханз бичиж, ослын дуудлага хийх боломжтой болжээ.

15 жил нэрээ солиогүй OS X шинэчлэгдэж,  автоматаар түгжээ тайлах горим, Apple Pay-ийн веб хувилбар зэргийг агуулсан бөгөөд Siri суурин компьютер дээр ажилладаг болов.
 
Харин iOS 10 үйлдлийн системийн хувьд хэрэглэгч утсаа халааснаасаа гаргаад өөр рүүгээ харуулахын төдийд дэлгэц нь асдаг горимтой болж, 3D Touch ашиглан илүү олон зүйл хийх боломж бүрджээ.
 
Жишээ нь арай чанга дарсны ачаар аппликейшнүүд дэлгэрэнгүй мэдээлэл харуулж, дүрс бичлэг үзэж, зурваст хариу бичиж, баруун тийш хуруугаараа чирэхэд камер шууд ажилладаг болсон байна.

Хамгийн гол нь Siri-ийн SDK буюу хөгжүүлэгч нар өөрсдийн аппликейшнийг Siri-тэй холбох боломжтой болсон явдал.

Тавдугаар сар – Google I/O

Технологийн салбарын хамгийн их хүний анхаарал татдаг, хамгийн олон хүн сонирхдог зүйл бол яах аргагүй Apple, Google, Facebook тэргүүтэй компаниудын шинэ бүтээгдэхүүн, үйлчилгээнүүд. Цаг үргэлж шинийг эрэлхийлж, цаг үргэлж үүндээ тэргүүлэгч байдаг учраас тавдугаар сарын хувьд Google-ийн I/O чуулган хамгийн том үйл явдал байв.

Дэлхий даяар 2 тэрбум гаруй ухаалаг утас хэрэглэгч байгаагийн талаас илүү хувь нь ашигладаг Андроид үйлдлийн системийн шинэ хувилбар хэрхэн өөрчлөгдсөн талаар Google танилцуулсан юм.

250 гаруй зүйл өөрчлөгдсөн Андроид N үйлдлийн систем зуны сүүлээр хэрэглэгчдийн гарт хүрсэн бөгөөд Google чуулганы үеэр Google Home, Google Allo, Google Assistant, Google Duo зэрэг бүтээгдэхүүн, үйлчилгээнүүдээ олон нийтэд дэлгэжээ.

Энэ сард Элон Маскын санаачилсан Hyperloop технологийг хөгжүүлж буй Hyperloop One компани хоёр секундын урттай туршилт хийж, Хятадын компани Apple нэрээр өөрсдийн бүтээгдэхүүнээ үйлдвэрлэх эрхтэй гэж шүүхээс шийдвэр гарсан бөгөөд Apple харин Хятадын DiDi Chuxing компанид нэг тэрбум ам. долларын санхүүжилт хийхээр болсон юм.

Дөрөвдүгээр сар - 360

Гэрэл зураг, дүрс бичлэгийн шинэ хэв маяг 360 технологийн хэрэглээ өнгөрч буй 2016 онд нэмэгдсээр өдийг хүрч байна. Өнөөдөр зах зээл дээр боломжийн үнэтэй, ашиглахад хялбар 360 градусаар зураг авдаг, бичлэг хийдэг төрөл бүрийн камер худалдаанд гарчээ.

Хамгийн сүүлийн жишээ болох технологийн хувьд зах зээл дээрх ямар ч загвараас хол илүү болсон ORAH 2017 оны нэгдүгээр сард худалдаанд гарах гэж байна. Тэгвэл хэрэгцээ, шаардлага нь нэмэгдэж, ийм төрлийн контент бүтээгчид нэмэгдсэн учраас Youtube 360 шууд дамжуулалт дэмждэг болсон гэдгээ дөрөвдүгээр сард зарласан юм.

Өөрсдийн платформ дээр 360 бичлэг дэмждэг болсноос яг нэг жилийн дараа шууд дамжуулах горимыг тэд санал болгов. Хэрвээ хэрэглэгч 360 камертай, 10-20Mbps интернет хурдтай бол Youtube-ийн 360 шууд дамжуулалт нээлттэй.

НЭМЭЛТ: Theranos-ыг луйврын хэргээр шалгаж эхлэв.

Гуравдугаар сар – Виртуал ертөнцөд тавтай морил

2014 оноос хойш VR технологийн хөгжил эрчимтэй өсөж анхдагчдын нэг Oculus Rift энэ жилийн гуравдугаар сард бүтээгдэхүүнээ албан ёсоор худалдаанд гаргав. VR технологи хэрэглэгчдийг зөвхөн виртуал орчинд аваачаад зогсохгүй, биеэр очих боломжгүй газарт хүргэх хүртэл боломжтой болжээ.

Хэрэв бид энэ орчинд байгаа зүйлстэй яг л бодит амьдрал дээр байгаа мэт харилцаж чаддаг болсон тохиолдолд хүн төрөлхтөн хоёр нийгэмд нэгэн зэрэг оршин тогтнодог болно. Цахим спортын хөгжил ч цаашид энэ технологид суурилдаг болох учраас салбарын анхдагч Oculus Rift аргагүй онцлох үйл явдал юм.

Үүнээс гадна Apple компани 4 инчийн утасны зах зээлийг мартаагүй гэдгээ илэрхийлж, үзүүлэлтээрээ iPhone 6s-тэй ижил гэхдээ авсаархан хэмжээтэй iPhone SE загвараа танилцуулсан бол Google-ийн хиймэл оюун ухаан дэлхийн Го Даамын аваргыг мад тавьжээ. 

Хоёрдугаар сар – Эйнштейний зөв буюу ТАТАЛЦЛЫН ДОЛГИОН

2016 оны хоёрдугаар сард WhatsApp хэрэглэгчийн тоо нэг тэрбумд хүрч, iPhone 6-ын хурууны хээ мэдрэгчтэй холбоотой асуудал сөхөгдөж, Netflix-ийн хэрэглээ дэлхий даяар эрчтэй нэмэгдэж, Apple Холбооны мөрдөх товчоотой шүүхээр заргалдаж эхэллээ.

Гэхдээ эдгээрээс гадна LIGO судалгааны төвийн эрдэмтэд таталцлын долгионыг илрүүлсэн гэдгээ албан ёсоор зарласан явдал байв. Тэд 2015 оны есдүгээр сарын 14-ний өдөр 1,3 тэрбум жилийн тэртээ хоорондоо нэгдсэн хоёр хар нүхний таталцлын долгионыг илрүүлсэн юм.

Аль 100 гаруй жилийн өмнө Альберт Эйнштейн таталцлын долгионы тухай таамаг дэвшүүлж байсан бөгөөд ийнхүү хүн төрөлхтөн таталцлын долгион байдаг гэдгийг албан ёсоор баталж, өөрөөсөө гэрэл цацруулдаггүй, хар нүх мэтийн зүйлсийг судалж болохоор болсон юм.

Нэгдүгээр сар – CES 2016 буюу ЦАХИЛГААН МАШИНЫ ШИНЭ ЭРИН

Лас Вегаст зохиогддог CES үзэсгэлэн цахилгаан бараа хийгээд технологийн дэвшлийн тухайн жилийн ерөнхий төрхийг гаргадаг. Зөвхөн тухайн жил ч бус цаашдын ирээдүйн нэг илрэл эндээс харагдана.

Автомашины салбарыг үндсээр нь өөрчилж буй хоёр технологи болох өөрийгөө жолоодох систем, цахилгаан хөдөлгүүр хоёр CES 2016-ын хамгийн сонирхолтой зүйлс байв. Энэ салбарт дэндүү олон жилийг өнгөрүүлсэн Audi, GM, BMW, Mercedes Benz хүртэл өөрийгөө жолоодох систем бүхий концепцуудаа танилцууллаа.

Харин тэдний дунд цоо шинэ тоглогч болон орж ирсэн Faraday Future хамгийн онцгой нь байв. Нэрт эрдэмтний нэрээр компаниа нэрлэсэн Faraday Future ойрын хугацаанд Tesla-ийн өрсөлдөгч болох зорилготой.

2017 оноос үйлдвэрлэх автомашин нь үнийн хувьд ч, үзүүлэлтийн тал дээр ч Tesla-гаас дутахааргүй байх болно гэдгийг тэд FFZERO1 концепцоороо үзүүлсэн юм.