Ц.Элбэгдорж: Эрүүл, аюулгүй орчинд амьдрах эрх чинь нээлттэй шүү, МИНИЙ АРД ТҮМЭЭН


2017-01-11 11:18 GMT+8

Ерөнхийлөгч Ц.Элбэгдорж агаарын бохирдлын талаар болон өчигдөр хуралдсан Үндэсний аюулгүй байдлын зөвлөлөөс гарсан зөвлөмжийн талаар сэтгүүлчдэд яг одоо Төрийн ордны Иргэний танхимд мэдээлэл хийж байна.

Хугацаагаар эрэмбэлэж харах :
15:34 2017-04-21

Ерөнхийлөгч Ц.Элбэгдорж агаар, орчны бохирдлын талаар болон өчигдөр хуралдсан Үндэсний аюулгүй байдлын зөвлөлөөс гарсан зөвлөмжийн талаар сэтгүүлчдэд яг одоо Төрийн ордны Иргэний танхимд мэдээлэл хийж байна.

Тэрбээр "Нийслэл хотын агаар, орчны бохирдлын асуудлыг өчигдөр Үндэсний аюулгүй байдлын зөвлөл өргөтгөсөн хурлаар авч хэлэлцсэн. Хуралдаанд төрийн өндөрлөгүүд, сайдууд, УИХ-ын гишүүд оролцсон. Мөн орчны бохирдлын чиглэлээр ажилладаг мэргэжилтнүүд, нийслэлийн удирдлага оролцсон. Энэ хуралдааныг телевизээр шууд дамжуулаагүй. Учир шууд дамжуулаад эхлэхээр манайх асуудлаа биш өөрийгөө дөвийлгөх гээд байдаг. Иймээс асуудал руугаа анхаарлаа хандуулах үүднээс хаалттай хуралдсан"

Гэрэл зургийг Б.Бямба-Очир / MPA.mn

15:34 2017-04-21

Монгол Улсын төрийн тэргүүний хувьд энэ хурлаас ямар шийдвэр гарсан, цаашид ямар арга хэмжээ авах гэж байгаа талаар мэдээлэл өгөх гэж байна. ҮАБЗ-өөс зөвлөмж гарсан.

Энэхүү зөвлөмжийг гаргахдаа Үндсэн хуулийн заалтаа үндэслэн гаргасан. Тухайлбал шилжилт хөдөлгөөнийг хорьсон нь Үндсэн хуулийг хорьсон гэж надаас асууж байна. Үндсэн хуульд "Монгол Улсын иргэн эрүүл, аюулгүй орчинд амьдрах ёстой" гэж заасан байдаг. Энэ зөвлөмж нь Үндсэн хуульд нийцсэн, нийт иргэдийн эрх ашигт нийцсэн.

15:34 2017-04-21

ЭРҮҮЛ МЭНДЭЭРЭЭ ХОХИРСОН УТААНЫ ҮЕ БИЙ БОЛЖ БАЙНА

Эхийн хэвлийд байгаа хүүхэд амьгүй төрж байхад ЭНИЙГ ГАМШИГ ӨӨР ЮУГ ГАМШИГ гэх вэ. Улаанбаатар хотод шилжин ирж байгаа хүмүүс эрүүл, аюулгүй орчинд амьдрах гэж ирсэн болохоос биш эрүүл мэндээрээ хохирохоор ирээгүй. Одоо эрүүл мэндээрээ хохирсон утааны үе бий болж байна.

2009 онд Ерөнхийлөгч болоод би Улаанбаатар хүн амьдрахад аюултай хот болсныг би хэлж байсан. 2011 онд Үндэсний аюулгүй байдлын зөвлөлийг анх удаа хуралдуулж байсан. Та нар дотроос нь утаагаа харж чадахгүй байгаа бол дээрээс нь хар гэж би 2011 онд хэлж байсан. Тухайн үед хүмүүс тоодоггүй, тоож ч бичдэггүй байсан. Манай иргэд дулаараад ирэхээр утаагаа мартдаг.

Хэвлэл мэдээллийнхэн түргэний байгууллага шиг ажиллах хэрэгтэй. Хэцүү байгаа юм уу.

Агаарын бохирдлоос төлбөр авах тухай хуулийг 2010 онд УИХ-ыг шахаж байгаад гаргаж байсан. Давосын чуулганаар жил болгон би агаарын бохирдлыг ярьдаг байсан. Агаарын бохирдлын асуудалд хамгийн их анхаарал хандуулсан Ерөнхийлөгч гэж намайг Дэлхийн Байгаль орчны газраас шагнаж байсан.

Хэвлэл мэдээлэл хүртэл энэ асуудлыг тоож бичдэггүй байсан. Засгийн газар, УИХ хүртэл хууль санаачлаагүй. Нийслэл хотын агаарын бохирдлын хууль батлах санаачлагыг анх би гаргаж байсан. Үндэсний хорооны даргыг ахлах хүн ч байгаагүй.

Гамшгийн бүсэд АРДЧИЛАЛ ЯРИХГҮЙ.

15:34 2017-04-21

УТААНЫ АСУУДАЛ ҮРГЭЛЖ МИНИЙ СЭТГЭЛ ЗҮРХЭНД БАЙСАН

Одоо бид сэрж байгаа юм биш. Утааны асуудал үргэлж миний сэтгэл зүрхэнд байсан. Ийм хууль, зөвлөмж гаргуулахад нөлөөлж байгаа нь хийхийн эхлэл. Та нар ч гэсэн хоёр гурван сарын дараа утааны асуудлыг мартана.

Утааны гамшиг бол Монголчуудын өөрсдийнх нь гаргасан гамшиг. Утааны ард нэртэй, устай, зүстэй хүн сууж байгаа. Утаа гаргаж байгаа зуухны цаана нэг аав, ээж, өвөө, эмээ сууж байгаа. Одоо бүгдээрээ Ерөнхийлөгчөөс эхлээд хариуцлагатай болъё. Дугуй шатаахаа больё.

15:34 2017-04-21

Монголд сайн чанартай нүүрснээс их юм байхгүй. Хятад руу гаргаж байгаа сайн чанарын нүүрсээ дотооддоо ашиглах хэрэгтэй. Төвлөрсөн цахилгаан станцууд саяар яригддаг нүүрс түлдэг. Гэхдээ гэр хороолол тийм их хэмжээний нүүрс түлдэггүй. Энэ бол шийдвэрлэх асуудал. Монголд нүүрснээс их юм байхгүй. Ийм юмыг сэтгүүлчид та нар шаардахгүй байна шүү дээ.

15:34 2017-04-21

ЗАСГИЙН ГАЗРЫН ОРДНЫГ ХОТООС ГАРГАВАЛ ОЛОН ЗҮЙЛ ӨӨРЧЛӨГДӨНӨ

ҮАБЗ-ийн хуралдаанаар өчигдөр гурван асуудлаар нэгдмэл байр суурьт хүрсэн.

Нэгдүгээрт, Улаанбаатар хотын агаарын бохирдол гамшгийн хэмжээнд хүрсэн гэдгийг хүлээн зөвшөөрөх. Гамшгийн бүсээ тодорхойлох. Тус бүсэд хориглох үйл ажиллагааг тодорхойлох.

Хоёрдугаарт, Онцгой горимоор ажилладаг болох. Онцгой байдлаар ажилладаг бүтцээ бий болгох. Агаарын бохирдлыг бууруулах Үндэсний хорооны нэрийг Онцгой байдлын Үндэсний хороо гэж өөрчлөх. 

Гуравдугаарт, Аюултай орчноос аюулгүй орчин нүүлгэн шилжүүлэх. Бүх аймгууд нүүлгэн шилжүүлэлтэд оролцох ёстой. Засгийн газрын ордныг хотоос гаргавал олон зүйл өөрчлөгдөнө.

15:34 2017-04-21

Авлигал Монголыг муухай харагдуулж байна гэж би хэлдэг байсан. Одоо утаа Улаанбаатарыг муухай харагдуулж байна. Хөрөнгө оруулалт хийгээд хэрэггүй үр ашиггүй хот болж байна.

Улаанбаатарыг тойрсон ногоон байгууламж, бохирдлоо шүүж чадахаа больсон. Хүн биш байгаль дэлхий өөрөө утааг хүчрэхгүй байна.

Зам тээврийн сайдтай өчигдөр уулзахдаа тээврийн асуудлыг хурдан шийдвэрлэх талаар ярьсан. Улаанбаатарын тэлэлтийн асуудлыг шийдвэрлэх хэрэгтэй. Нэмж бүтээн байгуулалт хийвэл Улаанбаатараас гадна хийнэ. Энэ асуудлыг төр Засаг нь дэмжиж өгөх хэрэгтэй.

15:34 2017-04-21

Сэтгүүлчид Ерөнхийлөгчөөс асуулт асууж байна.

GoGo.mn сайтын Ерөнхий редактор О.Ариунбилэг: Таны хэлсэн үг, хийсэн мэдээллийг харвал өнгөрсөн хугацаанд Та мундаг ажиллаж байсан юм шиг байна. Хэвлэл мэдээлэл огт юу ч хийгээгүй юм байна. Иргэд огт санаа зовохгүй байсан юм шиг байна. Гэхдээ өнөөдрийн энэ байдал АН, МАН-ы эрх баригчдын юу ч хийгээгүйн гор шүү дээ. Яагаад хөдөөгийнхөн бүгд хотод шаваад байна. Яагаад таны ярьсан сайхан зүйлс чинь биелэхгүй 1.3 сая хүн гамшгийн бүст амьдраад байна.  Яагаад таны ярьж байсан зүйлс биелээгүй юм?

Ерөнхийлөгч Ц.Элбэгдорж: Шүүмжлэлийг хүлээн авч байна. Гэхдээ би түрүүн хэлсэн бие биенийхээ ажлыг үгүйсгэх хэрэггүй. Айл бүхэн, хүн бүхэн утааг арилгах асуудалд хувь нэмрээ оруулах хэрэгтэй. Би хатуу үг сонсож сурсан. Агаарын бохирдлыг бууруулах Үндэсний хороо, УИХ дахь Байгаль орчин, хүнс, хөдөө аж ахуй байнгын хороо, иргэд агаарын бохирдлыг бууруулахад хамтран ажиллах хэрэгтэй.

NTV телевизийн сэтгүүлч н.Ууганбаяр: Иргэдийн зүгээс хотын татварыг өндрөөр тогтооё гэсэн санал гаргаж байна. Энэ талаар та ямар байр суурьтай байгаа вэ. Сайжруулсан зуух зэрэг алдаатай бодлогыг үргэлжлүүлэх шаардлага байна уу.

Ерөнхийлөгч Ц.Элбэгдорж: Алдаатай шийдвэр гарсан байж болно гэхдээ бүх ажлыг үгүйсгэж болохгүй. Системтэй, дэс дараатай, удаан хугацаанд явж энэ асуудлыг бид шийдэж чадна. ҮАБЗ-өөс гарсан зөвлөмжинд хотын татварын талаарх асуудлыг оруулж ирэх байх.

МҮОНТ-ийн сэтгүүлч н.Хулан: 2013 оноос хойш хэрэгжүүлсэн Орон нутгийн хөгжлийн сангийн тухай сурвалжлагыг Хэнтий аймгаас бэлдсэн. Хэнтий аймагт өнгөрсөн жил 7 тэрбум төгрөг хуваарилж байсан бол энэ жил хоёр тэрбум болж буурсан. Улаанбаатар руу битгий нүүж ир гээд байна. Төсвийн  мөнгийг танаад байхаар иргэд хөдөө яаж амьдрах вэ.

Ерөнхийлөгч Ц.Элбэгдорж: Орон нутгийн хөгжлийн сангийн мөнгөөр аймаг, сумдууд хөгжсөн. УИХ-д би орон нутгийн хөгжлийн сангийн мөнгийг битгий бууруул гэж хэлж байгаа. Монголын хэмжээнд харц сэтгэе.

TM телевиз: Таны шагнал авсаныг сэтгүүлчид бид мартсан байх. Гэхдээ та 2009 оноос хойш агаарын бохирдлын чиглэлээр ярьж байсан. Тэгвэл найман жилийн ҮАБЗ-ийн зөвлөмж гаргаж, гамшгийн хэмжээнд хүрсэн гэдгийг дөнгөж одоо хүлээн зөвшөөрч байна вэ.

Ерөнхийлөгч Ц.Элбэгдорж: Шүүмжлэлийг би хүлээн авна. Өөрийгөө магтсанд намайг уучлаарай. Утааны асуудалд улстөржүүлэлгүйгээр зорилт гаргаад ажилламаар байна. ҮАБЗ өнгөрсөн хугацаанд таван удаа хуралдаж, зөвлөмж гаргасан. Энэ асуудал ярьж шийдвэрлэх асуудал биш. ҮАБЗ агаар, орчны бохирдлын асуудлыг гурван сар тутамд нэг удаа хэлэлцэж байхаар болсон. Утааны асуудлыг Үндэсний хороо сард нэг удаа, байнгын хороо улиралд нэг удаа хэлэлцэхээр болсон. Би энэ УИХ-ын бүрэлдэхүүнд маш их итгэж байна. Энэ УИХ-д олон удаа сонгогдсон туршлагатай хүмүүс бий. Тэд нарт шийдэх итгэл, зориг байгаа. Энэ асуудплаар тодорохой шийдвэр гарахгүй бол УИХ-ын гишүүд, эрх бүхий хүмүүс цаг нөгцөөж байна гэж үзнэ.

15:34 2017-04-21

Утааны бүсийг ногоон бүс болгох бодлого баримаар байгаа юм. Улаанбаатар хотын хойд талд ногоон байгууламж, эко бүс байгуулах хэрэгтэй. Ногоон бүстэй байх юм бол Улаанбаатар хот ирээдүйд амьдрах дүр зургийг би харж байна.

Улаанбаатарын тэлэлтийг Төв, Булган, Өвөрхангай, Хэнтий, Архангай, Хөвсгөл, Дархан-Уул гэсэн ийм том хэмжээнд хийх хэрэгтэй. Утааны эсрэг авч хэрэгжүүлж буй шийдвэр болгоны төлөө би явна.

Хамтын ажиллагаа маш чухал Монголд хамтарч ажиллаад шийдчих гурван асуудал бий. Утаа, дэд бүтэц. Биенээ мохоодог үндэстэн биш. Нийлж хамтарч ажиллах хэрэгтэй.

Монголчууд бид АСЕМ-ын дээд хэмжээний уулзалтыг хэрхэн зохион байгуулсан вэ гэдгээ эргээд саная. Энэ дээд хэмжээний уулзалтыг зохион байгуулахад төр засгийн бүх байгууллагууд нэгдэж ажилласан. Хэвлэл мэдээлэл нэгдсэн. Их дээд сургуулиуд нэгдсэн. Ард түмэн нэгдэж сайн дурын 1000 гаруй залуучууд ажилласан. Ингэснээрээ бид АСЕМ дээд хэмжээний уулзалтыг эх орондоо амжилттай зохион байгуулж олон улсад эх орныхоо эерэгээр сурталчилж чадсан. Яг үүн шиг утааны эсрэг тэмцье. Улс төржихөө больё.

15:34 2017-04-21

GoGo.mn сайтын Ерөнхий редактор О.Ариунбилэг: Манай сайтын зүгээс хэвлэл мэдээллийн байгууллагуудад хандан агаарын бохирдлын асуудлаар нэгдэх уриалга гаргасан. Өнөө орой 19.50 цагт бүх телевизүүд утааны эсрэг шторкыг нэвтрүүлнэ, мөн энэ цагт бүх сайт тэргүүн онцлохдоо утааны зураг нийтэлнэ. Мөн хэвлэл мэдээллийн байгууллагуудын редакторуудын зүгээс "Editors club" гэдгийг байгуулсан. Үндэсний хорооноос бид нартай хамтран ажиллах боломж байгаа юу.

Ерөнхийлөгч Ц.Элбэгдорж: Маш сайхан санаа байна. Хамтын ажиллагаа маш чухал. Удирдлага сайн байвал тэр удирдлагаа ард түмэн дэмждэг. Маш олон сайн санаачлагууд гарч байна. Ингэж орж байж хяналт бий болдог. Олон нийтийн, хэвлэл мэдээллийн хяналт байх ёстой. Хэвлэл мэдээллийн хяналт, шүүмжлэлээс айх хэрэггүй. Хамтарч ажиллах хэрэгтэй. Соёл урлагийнхан, шинжлэх ухааны академийнханыг утааны асуудалд нэгдэхийг уриалж байна.

15:34 2017-04-21

TV5 телевизийн сэтгүүлч н.Болдсайхан: Сайн санаачлагууд гаргаж байна. Гэхдээ энэ санаачлагууд хэзээ биелэх вэ.

Ерөнхийлөгч Ц.Элбэгдорж: Утааны асуудал шийдэгдсэн ч гэсэн хөрсний бохирдлын асуудал гарч ирнэ. Ойрын 50-60 жилдээ сэргээн босголт явагдана. Шийдвэрлэх шаардлагатай маш олон асуудал бий.

ЕTV телевизийн сэтгүүлч н.Баярмаа: Магадгүй хэвлэл мэдээллийн байгууллага нөлөөллийн үүргээ бага гүйцэтгэсэн байх. Өнгөрсөн хугацаанд бид утааны асуудлыг яриагүй биш ярьсан. Өнөөдөр ард иргэд ч дэмжиж байна ард иргэд ч дэмжиж байна. Агаарын бохирдлын эсрэг зарцуулж буй мөнгөнд хяналт тавихгүй бол мөн л итгэл алдарна. Хяналт, хариуцлагын хуулийг оруулж ирэх хэрэгтэй.

Ерөнхийлөгч Ц.Элбэгдорж: Итгэл төрж байна. Гэхдээ цагаан сар өнгөрөөд дулаараад ирэхээр мартагдахгүйн тулд хамтарч ажиллах хэрэгтэй. Хариуцлагын тухай заалтыг хуулиндаа оруулах хэрэгтэй сайдууд аа. Шилэн данс, хариуцлага мэдээж хэрэгтэй. Олон нийт, иргэд шаардлага тавьж байгаа нь сайн хэрэг.

Өдрийн сонины сэтгүүлч н.Энхболд: Төрийн байгууллагуудыг Улаанбаатараас гаргах хэрэгтэй. Хэрвээ гаргавал нийслэлийг утаатай чигээр нь орхиод явах юм уу?

Ерөнхийлөгч Ц.Элбэгдорж: Төрийн захиргааны байгууллагын гаргавал ойролцоогоор 100-160 мянган хүн Улаанбаатараас гарна. Хэрвээ ийм шийдвэр гарвал Улаанбаатар хотын нягтаршил буурна. Тийм учраас би нүүх ёстой гэж үзэж байна. Нүүдэл бол их бүтээн байгуулалтын эхлэл болно. Нийслэл хот, төрийн захиргааны байгууллага нүүнэ гэдэг бол хэдэн зуунд ганц удаа гаргадаг шийдвэр. Энэхүү шийдвэрийг гаргах цаг нь ирсэн гэж би бодож байна.

Парламентын суваг н.Дуламсүрэн: Ерөнхийлөгч та эндээс гараад утааг бууруулахад хамгийн түрүүнд юу хийх вэ. Маш олон мянгаараа баригдсан орон сууцанд гэр хорооллын иргэдийг оруулж болохгүй юу. Таниас хамгийн эхлээд бид ямар ажил хүлээх вэ?

Ерөнхийлөгч Ц.Элбэгдорж: ҮАБЗ-ийн зөвлөмжийг хамгийн түрүүнд хэрэгжүүлж эхлэнэ. Дэлхийд хамгийн их бохирдолтой нийслэлийн нэг бол яах аргагүй Улаанбаатар хот. Энэ бол дэлхий нийтийн өмнө бидний нэр хүндийг унагааж байна. Утааг бууруулах чиглэлээр олон нийт, хэвлэл мэдээллийн байгууллагууд хамтарч ажиллая.

GoGo Facebook Хуудас

ХОЛБООТОЙ МЭДЭЭ

 
 
МАН-ын даргад эдгээр хүмүүсийн хэнийг нь та дэмжих вэ?
Нийт 2979 санал өгсөн байна.

Дээшээ