Гоо сайхны салоны зэрэглэлийг тохижилтоос нь мэдэж болно

Бизнесийн мэдээ

2010-07-14 14:29 GMT+8

Мөнгө төлж иднэ, мөнгө төлж бас турна. Энэ нь мөнгөтэй, ажилгүй хүмүүсийн хийдэг ажил мэт харагдах боловч цаад хүндээ бол байнга л сэтгэлийн зовлон дагуулж явдаг нэг төрлийн өвчин. Дээр нь уусан эм, иддэг хүнснээс нь болж нүүрээр нь батга шавна. Энэ нь сэтгэлээр унах бас нэг шалтгаан болдог. Сэтгэл дундуур хүн хэзээ ч инээдэггүй. Энэ нь бусдад сайхан харагдахгүй нь ойлгомжтой. Үүнээс үүдэн царай муутай хүн ааш муутай байдаг ч гэж ярьдаг. Харин мөнгөгүй нэгэн нь идэхгүйгээр турдаг. Энэ нь мөн л сөрөг нөлөөтэй.

Орчин үеийн охид хөвгүүдийн бодсон, мөрөөдсөн бүхэн нь өөр болж. Наанадаж л эхээс төрсөн бие, нүүр царайгаа голж, гоо сайхны мэс ажилбар хийлгэхийг мөрөөддөг. Хэрэв эцэг, эх нь зөвшөөрөхгүй бол соёлтойгоор шаарддаг. Охидын 60-70 хувь нь нүд, хөмсөг, уруул, хамраа, 10 хувь нь чихээ, таван хувь нь хөхөндөө, хөлөндөө жижиг мэс ажилбаруудыг хийлгэдэг гэжээ.

Энэ тухай манай сонинд ярилцлага өгсөн гоо сайхны мэс заслын эмч ярьж байсан. "Ээж, аав зөвшөөрөхгүй байна. Та энэ ээмэг, бөгж, гинжийг үнэд нь бодоод авчих" шалах нь ч бий гэнэ. Нүүрээ будаж гоёх нь энүүхэнд болж. Багш нар нь ч хүүхдүүддээ "Хүүхдийн энгэсэг байдаг гэнэ. Та нар авч түрхээрэй" гэж зөвлөдөг гэсэн. Хөвгүүд энэ бүгдээс юугаараа дутах билээ. Үсэндээ элдэв хими хийлгэн гоо сайхны салон хэсч, нүүрэндээ крем түрхэж явна. Ийнхүү эрэлт ихтэй гоо сайхны салонууд олноороо шинээр байгуулагдах болжээ. Харин тэдний хүсэл дээр дөрөөлөн чанаргүй бүтээгдэхүүнээр, шаардлагад нийцэхгүй орчинд үйлчилгээ үзүүлж буй нь харамсалтай.

Стандартчилал, хэмжил зүйн газраас гоёлын гоо заслын үйлчилгээнд тавигдах шаардлагыг нарийвчлан боловсруулж стандарт баталжээ. Тиймээс ийм бизнес эрхлэх гэж буй иргэдэд зориулан дараах мэдээллийг хүргэж байна.

Энэ чиглэлийн бизнес эрхлэгчдэд хяналт тавихад энэ л стандартыг мөрдлөгө болгодог юм байна. Мэдээж үйлчилгээнд ашиглагдах бүтээгдэхүүн болон цахилгаан, дулаан, ажлын байрны гэрэлтүүлэг, аюулгүй ажиллагааны гээд бусад олон стандартыг үйл ажиллагаандаа мөрдлөгө болгодог аж.

Гоо сайхны үйлчилгээ гэж...
Тэгэхээр мэдээллээ гоёлын, гоо сайхны үйлчилгээ гэдэгт чухам юуг хамруулдаг болох талаар эхэлье. Гоо заслын иллэг орно. Үүнд толгой, нүүр, хүзүүний хэсэг, гар, хөлийг амраах зориулалтаар хийх бусад иллэгүүд орно. Мөн тос, бигнүүрийн тусламжтайгаар сэвх гуужуулна. Хөмсөг сормуус наах, будах, хэлбэр гаргаж засах, цэвэрлэх, хумсыг хэлбэрт оруулж засах, будах, шилэн хумс наах, чимэглэх, хумсан дээр зураг зурах мөн ердийн болон гоёлын будалт хийх зэрэг нь орно.

Аливаа гоо заслын үйлчилгээг дээд, нэг, хоёрдугаар зэргийн гэж ангилдаг аж. Тэгэхээр энэхүү зэргээс хамаарч тухайн газрыг хэрхэн нэрлэх нь хамаардаг байна. Жишээ нь, дээд зэргийнхийг нь "супер", нэгдүгээр зэрэглэлд "салбар", харин үлдсэн зэрэгт нь "цэг" гэж нэрлэх нь. Тэгэхээр энд заасан зэрэглэлийн дагуу тавигдах шаардлага нь ч өөр байх нь. "Супер" хэмээн нэрлүүлэхийн тулд үйл ажиллагаа явуулдаг байрны гадаах зогсоол, гэрэлтүүлэг, эмблем, хаалгандаа халаагуур байрлуулах шаардлагатай. Дээр нь гутал цэвэрлэгч дэвсгэр, таксофон, зөөлөн тавилга, саван ариутгах бодис зэрэглэлийн гэрчилгээ, үйлчилгээний дүрэм, дотоод журам гэх зэрэг 57 янзын юм шаарддаг. Гоо сайхны газрын шалыг паркетан эсвэл чулуун хавтан байхыг шаарддаг.

Харин дараагийн ангилал буюу гоо сайхны цэг ажиллуулахад энэ нь нэг их хамааралтай биш. Ажилчдын, ариун цэврийн, ажилчдын, амралтын, тэр бүү хэл агуулахын шалыг ч л ганчигаар бүрэхийг шаарддаг. Тэгэхээр уншигчид маань гоо сайхны газраар орохдоо тухайн газрыг ямар зэрэглэлийнх болохыг өөрсдөө мэдэж болох нь байна. Дээр нь эдгээр газруудад ажиллаж буй ажилтнууд ч зэрэглэлээрээ ялгаатай байх нь.

"Супер" зэрэглэлийн салонд ороход мастер болон I, II зэргийн гоо засалчид үйлчилнэ. Дээр нь үйлчилгээний менежер ажиллуулахыг шаарддаг. Харин "Салбар" болон "Цэг"-т менежер гэж тусдаа хүн ажиллуулах хэрэггүй юм байна. Гоо заслын үйлчилгээ эрхлэхэд багагүй багаж хэрэгсэл, материал авахыг шаарддаг. Кварцын гэрэл, нийтийн уурын, ариутгалын, иллэгийн, арьс тодорхойлогч аппарат, томруулагч шил, хөргөгч, компьютер, тоос сорогч, хумсны заслын иж бүрдэл гээд дурдвал олон зүйл байна. Орны даавууг хүртэл заавал цагаан, цэнхэр өнгөөр хийхийг зөвлөдөг юм байна.

Уншигч Та гоо заслын үйлчилгээ эрхлэхээр шийдсэн бол нарийн ширийн шаардлагуудыг MNS 5567: 2006 стандарттай танилцаарай.

Г.Энхтуяа

GoGo Facebook Хуудас
 
 
Та хувийн эмнэлэгт хүүхдээ үзүүлэхдээ сэтгэл хангалуун байдаг уу?
Нийт 2446 санал өгсөн байна.

Дээшээ