2017.03.09 Өнөөдөр болсон үйл явдлуудыг нэг ӨГҮҮЛБЭРЭЭР


2017-03-09 18:50 GMT+8
  • Монголын хөрөнгийн биржид бүртгэлтэй, хувьцаат компаниуд хоёрдугаар сарын 10-ны дотор 2016 оны санхүүгийн тайлангаа илгээх үүрэг хүлээдэг бөгөөд өнгөрсөн сарын 20-ны байдлаар бүртгэлтэй 226 хувьцаат компаниас 127 компани санхүүгийн тайлангаа ирүүлээгүй байв.
  • Нийслэлийн агаарын чанарын 08:00 цагийн цагийн мэдээгээр МҮОНРТ орчимд агаарын бохирдлын индекс хамгийн өндөр буюу 339-тэй байлаа.
  • МАН-ын Удирдах зөвлөл өчигдөр хуралдаж, Уул уурхай, хүнд үйлдвэрийн дэд сайдад УИХ-ын гишүүн асан Д.Загджав, Зам тээврийн сайд асан Н.Төмөрхүү, Ерөнхий сайдын зөвлөх Б.Төмөрчулуун нарын нэрийг дэвшүүлсэн байна.
  • "Хөх сувд 2017" олон улсын мөсний баярын эргэн тойрон ба юуг яаж сайжруулах боломжтой талаар сэтгүүлч А.Одонтуяагийн бичсэн “Мөсний баярын нүцгэн үнэн” нийтлэлийг уншаарай. 
  • Гуравдугаар сарын 11-12-нд Монголд анх удаа ФИБА-ын стандартад нийцсэн 3х3 сагсан бөмбөгийн тэмцээн болно.
  • "Монголын байгалийн баялаг, уул уурхайн салбарт чадавхийг бэхжүүлэх нь" төслийн хүрээнд Мицубиши Материал Техно, Эдийн Засгийн Судалгаа, Эрдэм Шинжилгээний Хүрээлэн (ERI), Японы Олон улсын хамтын ажиллагааны байгууллага (JICA) хамтран "Уул уурхайн бүтээгдэхүүний зах зээл: төлөв, хандлага" сэдэвт хурал зохион байгуулахаар болжээ.
  • Япон улсын Шизүока мужийн Изүнокүни хотын захиргаанд гадаад харилцааны мэргэжилтнээр ажилладаг Х.Саруултуяагийн ярилцлагыг сонирхоорой. 
  • “Эм Жи Эл Акуа” компанийн Вояж цэвэр усны үйлдвэр Сонгинохайрхан дүүргийн 170-р цэцэрлэгийн  450 гаруй хүүхдийн ундны усыг бүтэн жилийн хугацаанд хангахаар боллоо.
  • Менингококкт халдварын улмаас бага насны хүүхэд эндэх тохиолдол гарч байгааг Эрүүл мэндийн яамнаас мэдээлсэн бөгөөд хэрхэн урьдчилан сэргийлэх талаарх зөвлөгөөг хүргэж байна.
  • Нийслэл, дүүргийн иргэдийн Төлөөлөгчдийн хурлаас баталсан тогтоол, шийдвэр, хэрэгжүүлж байгаа үйл ажиллагааг иргэддээ танилцуулж, санал, санаачлагыг нь сонсож цаашдын үйл ажиллагаандаа тусган ажиллах зорилгоор “Иргэдээ сонсъё” аяныг дүүрэг бүрт явуулж байна.
  • Чингэлтэй дүүрэг дэх цагдаагийн нэгдүгээр хэлтсийн алба хаагчид Н, Ө, Б нарыг автобусанд зорчиж явсан эмэгтэйн түрийвч, олон нийтийн газраар зорчиж байсан иргэний гар утас хулгайлж байхад нь газар дээр нь илрүүлжээ.
  • Монгол, Канадын Засгийн газар хоорондын "Хөрөнгө оруулалтыг хөхиүлэн дэмжих, харилцан хамгаалах тухай Засгийн газар хоорондын хэлэлцээр" хүчин төгөлдөр болж хэрэгжиж эхэллээ.
  • Монголын төрийн үйлчилгээ үзүүлэгч зургаан байгууллагаас цагдаа болон эрүүл мэндийн байгууллага авлига авдаг үзүүлэлтээрээ тэргүүлсэн талаар судалгааны дүнг өнөөдөр танилцууллаа.
  • Чөлөөт бөхийн төлөө бие сэтгэлээ зориулан яваа дасгалжуулагчид нэгдэн Монголын чөлөөт бөхийн үндэсний академи байгуулжээ.
  • Баянзүрх дүүрэг дэх цагдаагийн хоёрдугаар хэлтсийн алба хаагчид “Өөрийгөө дуудлагын жолооч байна” гэж танилцуулан оройн цагаар баар, караокегоор үйлчлүүлээд гарч буй иргэдийг залилан, автомашиныг нь авч явдаг этгээдийг илрүүлжээ.
  • Олон улсын эмэгтэйчүүдийн өдөр Монгол Улсын хэмжээнд 161 эх амаржсан талаар Эрүүл мэндийн яамнаас мэдээллээ.
  • Манай улсын хүн амын тоо 3 сая 119 мянга 935-д хүрснийг Үндэсний статистикийн хороо цахим хуудсаараа дамжуулан мэдээллээ.
  • Монгол Улсын Ерөнхий сайд Ж.Эрдэнэбат БНСУ-д болсон Ой тогтоолтын олон улсын нээлттэй тэмцээнд багаараа амжилттай оролцсон тамирчдаа хүлээн авч уулзаж, баяр хүргэлээ.
  • G-Time компанийн үйл ажиллагааг сэргээхгүй гэдгийг Цагдаагийн ерөнхий газраас мэдээлэв.
  • Энэ сарын 24-нд зохион байгуулагдах Хакатоны талаар “Кретив Воркшоп” ХХК-ын ерөнхий менежер Э.Буяндэлгэртэй ярилцлаа.
  • Сүхбаатар дүүрэг дэх Цагдаагийн нэгдүгээр хэлтэс гуравдугаар сарын 7-ны өдөр дунд сургуулийн сурагчийг гэртээ харих замд нь үл таних этгээд аманд нь юм хийж, хулгайлж авч явахыг завдсан гэх хэргийг шалгаж байна.
  • Хэвлэлийн NNC publishing-аас эрхлэн хэвлүүлж, Э.Долгионы хянан тохиолдуулсан "Судлаачийн үг" хэмээх шинэхэн бүтээл АНУ-ын Конгрессын номын сангийн Төвд-Монгол номын фондод шинээр бүртгэгджээ.
  • ДЭМБ өвөлжилт, хаваржилтын хүндрэлийг даван туулах хүрээнд 35 мянган ам.долларын өртөг бүхий амь аврах багцыг тусламжаар нийлүүлэхээр төлөвлөжээ.
  • Охид, эмэгтэйчүүдийн эсрэг хүчирхийллийг таслан зогсоохын төлөө “Даван туулагчдын дуу хоолой” баримтат гэрэл зургийн үзэсгэлэнгийн нээлт өнөөдөр боллоо.
  • Хүүхэд багачуудад зориулсан "Маамуу" хивс, хивсэнцэр, ор хөнжлийн даавуу, өлгий, гудас зэрэг бүтээгдэхүүн тун удахгүй таны гар дээр очих гэж байгаа бөгөөд “Эрдэнэт хивс”, “Эрдэнэт кашмер” зэрэг компаниудын толгой компани болох “Натурал Текстайл групп” -ийнхан хүүхэд багачууддаа зориулсан эдгээр бүтээгдэхүүнийг "Монгол Контент” ХХК-тай хамтран хэрэглэгчдэдээ хүргэж буй юм. 
  • Монгол цэргийн өдөр, Зэвсэгт хүчний 96 жилийн ойн баярыг угтан нийслэлийн Баянзүрх дүүргийн Засаг даргын Тамгын газар, Цэргийн штабаас дүүргийнхээ чөлөөнд гарсан генералууд, хурандаа болон офицер, ахлагч нарт хүндэтгэл үзүүллээ.

ДЭЛХИЙД

  • Женевийн авто үзэсгэлэнд Volkswagen компанийн охин компани болох Bentley цахилгаан хөдөлгүүртэй, суудлын тэрэг танилцуулсан бөгөөд энэ загвар нь анх 2015 онд танилцуулж байсан EXP 12 Speed 6e концепц загварын цахилгаан хувилбар юм.
  • Хоёрдугаар сард БНХАУ-ын импорт өсөж, экспорт буурснаас тус улсын гадаад худалдааны тэнцэл 9.1 тэрбум ам.долларын алдагдалтай гарлаа.
  • ОХУ-ын улс төр судлаачид, эдийн засагчид Ерөнхийлөгч Путины сүүлийн таван жилийн ажлыг хэрхэн үнэлж байгааг тоймлон хүргэж байна.
  • Аль аль нь буулт хийхийг хүсэхгүй байгаа учраас БНАСАУ болон АНУ нүүр нүүрээрээ “мөргөлдөхөд” ойрхон байна хэмээн Хятадын Гадаад хэргийн сайд Ван И анхаарууллаа.
  • Хөгжиж буй Ази-Номхон далайн бүс нутгийн хөгжлийн тогтвортой байдлыг хангахын тулд 2030 он хүртэл тус бүс нутагт жилд 1.5 их наяд буюу нийт 22.6 их наяд ам.долларын дэд бүтцийн бүтээн байгуулалт шаардлагатай байгааг АХБ тэргүүн тайландаа онцолжээ.
  • Малайзын иргэний агаарын тээврийн “Malaysia Airlines” компанийн “MH370” дугаартай нислэг үйлдэж яваад сураггүй болсон нисэх онгоцыг эрж хайхад тус улсын Засгийн газар 100 сая гаруй доллар зарцуулаад байна.
  • Францын автомашин үйлдвэрлэгч Renault компани Женевийн авто үзэсгэлэнг өөрсдийн төслийн загвараар чимж байгаа бөгөөд энэ нь 4 хүрэхгүй секундэд 100 км/цаг хурд авдаг, 350 морины хүчтэй Trezor загвар юм.

GoGo Facebook Хуудас
 
 
Утааны улирал эхэллээ. Та амны хаалтыг өөртөө болон үр хүүхдүүддээ гадаа орчинд байнга зүүлгэж чадах уу?
Нийт 30 санал өгсөн байна.

Дээшээ